Diretór Ministériu Agrikultór no Peska (MAP) Munisípiu Viqueque, Carlos Pinto. Imajen Tatoli/Vitorino Lopes da Costa

VIQUEQUE, 11 juñu 2021 (TATOLI)– Dezde 2020 mai to’o 2021, irrigasaun prinsipál Bebui ho semi irrigasaun hamutuk 68 iha Munisípiu Viqueque la halo manutensaun rutina no periódiku.

Notísia Relevante : Viqueque kontinua kumpre protokolu prevensaun COVID-19

Kondisaun tékniku infraestrutura atuál irrigasaun prinsipál Bebui ho semi irrigasaun 68 iha Munisípiu Viqueque kuaze nakonu ho tahu ka rai-henek taka metin no belun insípidu  tanba du’ut moris nakonu iha kanu laran.

Ba kondisaun  ne’e, diretór Ministériu Agrikultór no Peska (MAP) Munisípiu Viqueque, Carlos Pinto, esklarese katak iha kada tinan MAP aloka orsamentu $1.000 ba asosiasaun irrigasaun tékniku Bebui hodi halo manutensaun, hamoos tahu no fo’er-sira ne’ebé taka bee-dalan (kanu) sira, maibé iha 2020 ho 2021   MAP la   halo manutensaun tanba hahú mosu estadu emerjénsia, serka sanitaria no konfinamentu obrigatóriu.

Diretór Ministériu Agrikultór no Peska (MAP) Munisípiu Viqueque, Carlos Pinto, ba Agência Tatoli iha Viqueque, Beloi, kinta lokraik (10/06), informa MAP Viqueque iha eskavadora atu kee irrigasaun sira ne’ebé hetan estragu hosi mota, maibé tanba mosu tiha Estadu emerjénsia atividade sira-ne’e paradu.

“Agora irrigasaun ida iha  Iratokor labele hadi’a  tanba  mosu estadu emerjénsia no serka sanitária. Funsionáriu  hodi eskavadora  iha Dili no  ema atu mai Viqueque tenke swab no problema seluk maka karreta tronton atu mobiliza eskavadora hosi Dili mai Viqueque sei halo manutensaun,”  Carlos Pinto klarifika.

MAP Viqueque  halo ona  planu  atu iha 2022  halo manutensaun ba irrigasaun sira ne’ebé hetan estragu, hanesan irrigasaun Bebui, Catucarbau ho  irrigasaun Daranau.

Jornalista : Vitorino Lopes da Costa

Editór      : Francisco Simões

HAKEREK NO HATÁN

Please enter your comment!
Please enter your name here