Centro Nacional Chega (CNC) halo audiénsia ho Bankada FRETILIN iha Parlamentu Nasionál, sesta (11/06). Imajen TATOLI/Evaristo Soares Martins.

DILI, 11 juñu 2021 (TATOLI)—Centro Nacional Chega (CNC) lideradu Hugo Maria Fernandes, husu bankada parlamentár sira atu ezije Ministériu Negósiu Estranjeiru no Kooperasaun (MNEK) no Ministériu Justisa (MJ) aprezenta proposta-rezolusaun ba Parlamentu Nasionál hodi halo ratifikasaun ba konvensaun internasional kona-ba ema lakon.

Diretór CNC halo observasaun, durante ne’e Timor-Leste halo ona ratifikasaun ba konvensaun oioin hosi ONU nian maibé konvensaun kona-ba ema lakon seidauk.

Durante ne’e Timor-oan sira no deputadu sira ezije Estadu Indonézia tenke hatudu Timor-oan sira-ne’ebé lakon, restu mortál sira inklui Prezidente Nicolau Lobato nia ruin maibé parte Indonézia la hatudu paradeiru.

“Timor-Leste seidauk ratifika konvensaun ema lakon, entaun ami-nia preokupasaun karik ita seidauk ratifika entaun ita atu ezije ba Indonézia, Indonézia sei bele hato’o fali razaun dehan Timor-Leste seidauk ratifika konvensaun ne’e, tanbasá ami (Indonézia) tenke iha obrigasaun hodi hatudu ema lakon ba imi. Entaun, ohin ami hato’o ba bankada FRETILIN, karik bele ko’alia ho Ministériu Negósiu Estranjeiru no Kooperasaun (MNEK) no Ministériu Justisa (MJ) hodi hato’o kestaun ida-ne’e, Katak, tanbasá mak ita seidauk bele ratifika konvensaun ema lakon,” Diretór Ezekutivu CNC Hugo Maria Fernandes, informa ba jornalista sira, hafoin halo audisaun ho Bankada FRETILIN, iha uma fukun, sesta ne’e.

Nia esplika, Governu liuhosi MNEK no MJ bazea desizaun koletiva Konsellu Ministru nian mak iha kompeténsia aprezenta proposta-rezolusaun ba Parlamentu Nasionál hodi halo ratifikasaun.

“Parlamentu Nasionál mak tenke ratifika maibé proposta ba ratifikasaun tenke mai hosi Governu,” nia dehan.

Bainhira Governu pro-ativu iha kestaun ne’e no reprezentante povu sira ratifika ona entaun bele prenxe obrigasaun mínimu Estadu Timor-Leste nian.

“Ne’e mínimu Timor-Leste tama iha obrigasaun ida forte liu hodi ezije ba Estadu Repúblika Indonézia, parte Indonézia nian ratifika ona, só ké Indonézia la halo-tuir obrigasaun balun maibé Timor-Leste seidauk ratifika,” Diretór CNC Hugo Maria Fernandes hateten.

Jornalista: Evaristo Soares Martins

Editór: Cancio Ximenes  

HAKEREK NO HATÁN

Please enter your comment!
Please enter your name here