Produtu Cesta Bázika. Imajen TATOLI/Antónia Gusmão

DILI, 11 juñu 2021 (TATOLI)–Prezidente Sentru Lojíztika Nasionál (CLN, sigla portugés), Agosto Junior Trindade, hateten, distribuisaun Cesta Bázika iha munisípiu Baucau no Viqueque ne’ebé CLN responsabliza, kuaze konklui maski hasoru difikuldade.

“Prosesu distribusaun Cesta Bázika iha Viqueque hetan difikuldade iha suku Uaibobo, tanba  situasaun udan no estrada la fó tempu to’o ohin loron, udan boot hela maibé distribuisaun kontinua la’o, inklui iha suku Nahareka no Liaruka ne’e dalan komesa maran no distribuisaun komesa la’o hela. Portantu iha Viqueque, iha suku tolu maka seidauk,” Prezidente CLN informa ba Agência  TATOLI, via telefónika, sesta ne’e.

Tuir Dirijente ne’e, loloos distribuisaun iha suku tolu ne’e hotu ona maibé tamba udan mak difikulta movimentu ekipa responsável.

“Ha’u espera buat hotu la’o di’ak, nune’e prosesu distribuisaun Cesta Bázika iha suku tolu  ne’e ramata tuir tempu ne’ebé maka iha,” nia akresenta.

Enkuantu, prosesu distribusaun Cesta Bázika iha munisípiu Baucau, kuaze konklui.

“Iha Baucau, postu Baguia no Quelicai maka ohin distribui no tuir planu atu enserra aban, maibé tenke hein foos hosi Dili, entaun kondutór tenke swab no foin hetan rezultadu ohin mak nia bele mai kedan no aban iha posibilidade enserra iha Baucau,” nia hatutan.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here