Kondisaun estrada rurál eis Kodim Maliana bá Colégio Maliana, iha 14 dezembru 2020. Imajen TATOLI/António Gonçalves

DILI, 10 juñu 2021 (TATOLI)-Governu Austrália apoia ona orsamentu millaun AU$62 liuhosi International Labour Organization (ILO) atu fó asisténsia téknika iha área formasaun ba planeamentu dezeñu no jestaun projetu ba Governu liuhosi Ministériu Obra Públika (MOP), hahú tinan 2012 to’o 2021.

“Ita-nia parseiru hanesan Governu Austrália apoia ona kuaze tinan 12, iha faze rua ona hamutuk millaun AU$62, ba asisténsia téknika, fó ba Ministériu Obra Públika ne’ebé ajuda Diresaun Nasionál Obra Públika, liu-liu Diresaun Nasionál Estrada, Ponte no Kontrolu Cheia (DNEPCC, sigla portugés) atu hala’o atividade planeamentu no investimentu ba estrada rurál,” Ministru Obra Públika, Salvador Eugênio Soares dos Reis Pires, hateten, iha salaun Hotel Novo Turismo, Lecidere, kinta ne’e.

Notísia relevante: Garante transpáransia, MOP envolve ILO avalia konkursu públiku estrada rurál

Governu Austrália nia apoiu ba planeamentu, liuliu kriasaun planu mestre ba estrada rurál no fó formasaun ba tékniku sira iha Diresaun Nasionál Estrada, Ponte no Kontrolu Cheia (DNEPCC, sigla portugés) hamutuk 500 inklui treina jestór kompañia sira kuaze 650-resin.

“Ita haree benefisáriu ka empreza manan-na’in sira kaer projetu estrada rurál sira ne’e kuaze 30% mai hosi emprezáriu feto sira no 7% hosi ema ho defisiente sira, atu implementa programa estrada rurál ne’e,” nia akresenta.

Liuhosi programa asisténsia téknika hosi Austrália, konsege harii ona laboratóriu iha munisípiu Baucau, Liquiçá, Same, Bobonaro no Rejiaun Administrativu Espesiál Oé-cusse no Ambeno (RAEOA) atu halo teste ba materiál prosesu konstrusaun hodi garante kualidade ba investimentu ne’e.

“Ita agradese ba apoiu hosi Governu Austrália liuhosi ILO, atu mellora investimentu Governu ba estrada rurál ne’e ho kualidade,” nia agradese.

Iha biban hanesan, Reprezentante Embaxadór Austrália ba Timor-Leste, Nick Cumpston, kompromete kontinua halo parseria ho ILO atu suporta asisténsia  ba Governu Timor-Leste nia programa estrada rurál ba dezenvolvimentu (ERD).

 “Hahú iha tinan 2012 to’o agora, Austrália apoia asisténsia téknika no formasaun ba téknika no kompañia sira atu atinje dezenvovlimentu signifikante ba populasaun Timor-Leste,” nia hatutan.

Nune’e, Austrália sei kontinua apoia asisténsia téknika ba MOP liuhosi DNEPCC, iha área planeamentu, kapasita empreza kompete konkursu públiku sira no jestór kompañia sira atu garante kualidade investimentu estrada rurál.

“Austrália sei kontinua apoiu atu investimentu estrada rurál bele la’o ho susesu hodi kontribui ba dezenvolvimentu ekonómiku iha Timor-Leste,” nia subliña.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here