Juiza administradora TDB, Jumiaty Maria Freitas. Imajen TATOLI/Natalino Belo

BAUCAU, 09 juñu 2021 (TATOLI)–Juiza Administradora Tribunál Distritál Baucau (TDB), Jumiaty Maria Freitas, hateten, durante implentasaun Serka Sanitária iha munisípiu Baucau, Tribunál TDB nafatin halo julgamentu normál.

“Durante implementasaun Serka Sanitária, Tribunál Distritál Baucau halo julgamentu ho normál, ami la prosesu turmu, ami atende mós prosesu komum, aleinde prosesu urjente, maibé agora faktu mak ne’e, interminente barak mak la’ós hela iha Baucau Villa,” Juiza Administradora informa ba Agência TATOLI, iha ninia knaar fatin, TDB Villa nova, Baucau, kuarta ne’e.

Difikuldade ne’ebé TDB hasoru mak prosesu julgamentu la efeitivu tanba regra Serka Sanitária limita transporte públiku nia movimentasaun, nune’e halo pesoál sira ne’ebé hela sai hosi área jurídiku Baucau, labele desloka maski Tribunál anúnsia ona kalendáriu julgamentu.

“Atu hateten katak ami la’o serbisu presta turmu hanesan serbisu ho karakter urjente, maibé ami mos serbisu atende prosesu komum maski iha períodu Serka Sanitária,” nia akresenta.

Munisípiu Lautém no Viqueque rasik bainhira atu ba halo julgamentu, tenki submete ba teste swab, nune’e difikulta mós prosesu maski Tribunál hato’o notifikasaun tanba autoridade hosi munisípiu rua fó sai regulamentu tenki iha teste COVID-19.

Enkuantu julgamentu iha munisípiu Manatuto la’o normál tamba iha koordenasaun di’ak no la presiza swab bainhira viajen hosi Baucau bá Manatuto.

“Notifikasaun ida susar tebes maka iha Lospalos no Viqueque tamba ami tenki halo teste swab no la’ós ami rasik maibé depende mós ba pesoál saúde, dala-ruma ba dehan iha sira atu halo swab, kuandu laiha ne’e difikulta sira labele tama,” nia hatutan.

Kona-ba atendementu serbisu iha TDB, hafoin halo swab masál dala-rua no rezulta funsionáriu na’in-rua pozitivu, agora iha ona sala izolamentu maibé nafatin serbisu no kumpre regra Organizasaun Mundiál Saúde (OMS) ne’ebé fó sai, maski iha mudansa oráriu ba funsionáriu.

Tuir dadus, prosesu kazu iha TDB ne’ebé rejista iha tinan 2021 hamutuk 302, kompostu hosi kazu kirme hamutuk 259 no kazu sivíl hamutuk 42.

TDB rasik alende halo julgamentu iha munisípiu Baucau, halo mós iha munisípiu tolu seluk hanesan Lautém, Viqueque no Manatuto.

Jornalista: Natalino Belo

Editora: Julia Chatarina

HAKEREK NO HATÁN

Please enter your comment!
Please enter your name here