Xefe Suku Uaitame, José do Rosario. Imajen Tatoli/Vitorino Lopes da Costa

VIQUEQUE, 09 juñu 2021 (TATOLI)– Programa implementasaun Cesta Bázika iha Suku Uaitame, Postu Administrativu Uatulari, Munisípiu Viqueque, konklui hotu ona no totál benefisiáriu 4.012.

“Programa Cesta Bázika iha ha’u-nia suku konklui ona no benefisiáriu hamutuk 4.012, iha programa ne’e Governu aprova kada abitante hetan $50, maibé kuantidade produtu   Cesta Bázika  la to’o tuir montante $50.  Ho ida ne’e mak   populasaun triste simu Cesta Bázika,” Xefe Suku Uaitame, José do Rosario, hateten ba Agência Tatoli iha Beloi, Viqueque, kuarta ne’e.

José do Rosario hatutan, produtu sira iha Cesta Bázika   ne’ebé presu la to’o $50 ne’e konsellu suku esplika ba komunidade, maibé komunidade kontinua la satisfeitu tanba valor produtu iha Cesta Bázika la to’o tuir valor osan $50.

“Se karik ba futuru mak Governu hakarak implementa programa Cesta Bázika, ha’u husu Governu tenke tetu didi’ak atu povu mós bele satisfás,” nia hateten.

Produtu sira ne’ebé komunidade Uaitame simu iha Cesta Bázika, maka hanesan foos, mina, trigu, fore-mungu, batar, masin-midar no kafé no relatóriu hatudu katak produtu sira ne’e nia folin $30 kada ema, katak abitante sira la hetan $50 tuir desizaun Governu nian iha programa Cesta Bázika.

Jornalista : Vitorino Lopes da Costa

Editór      : Francisco Simões

HAKEREK NO HATÁN

Please enter your comment!
Please enter your name here