Xefe Suku Uai-Mori, Francelino Antonio Gomes. Imajen Tatoli/Vitorino Lopes da Costa

VIQUEQUE, 07 juñu 2021 (TATOLI)- Xefe Suku Uai-Mori, Francelino Antonio Gomes informa, aplikasaun Estadu emerjénsia no serka sanitária ho  konfinamentu obrigatóriu difikulta ba komunidade sira iha Uai-Mori, Postu Administrativu Ossu, Munisípiu Viqueque, atu asesu ba merkadu.

“Iha situasaun Estadu emerjénsia, serka sanitária no konfinamentu obrigatóriu ne’e, ha’u-nia komunidade enfrenta difikulta atu lori sira-nia produtu ba merkadu. Ho nune’e, sira-nia vida ekonomia  susar tebes,” Xefe Suku Uai-Mori, Francelino Antonio Gomes, haktuir ba Agência Tatoli iha administrasaun munisipál Viqueque, segunda ne’e.

Ho sasidik sira-ne’e, xefe suku Uai-Mori ho autoridade lokál no komunidade koordena ho kompañia Feto Mesak ousi Venilale mak ba fa’an foos, mina no sasán sira seluk ba komunidade Uai-Mori hodi bele konsumu iha situasaun serka sanitária ne’e.

“Ha’u nafatin fó hanoin ba ha’u-nia komunidade hotu kontinua kumpre  regra hotu  ne’ebé Estadu hatuur iha luta kontra pandemia COVID-19. Ha’u nafatin husu komunidade sira karik hasoru urjente ruma informa ba ha’u no ba xefe aldeia sira hodi buka solusaun,” Francelino informa.

Suku Uai-Mori ba Postu Administrativu Ossu kuaze kilómetru 37 no suku ne’e rasik iha aldeia neen  (6), kompostu hosi Aldeia Uma-Liurai, Uma-Bo O, Uaibubu, Lulei, Uatulesu no Mea-Uain. Suku Uai-Mori  ho totál uma kain-514, membru família 2.329; feto hamutuk 1.188 no mane 1.141.

Jornalista       : Vitorino Lopes da Costa
Editór             : Francisco Simões

 

 

HAKEREK NO HATÁN

Please enter your comment!
Please enter your name here