Kondisaun Eskola Ensinu Báziku Filiál (EBF), Casnafar, Manleuana, Dili. Imajen Tatoli/Tomé Amado.

DILI, 08 juñu 2021 (TATOLI) – Ministériu Edukasaun, Juventude no Desportu (MEJD) distribui tan materiál limpeza ba eskola lima iha munisípiu Dili ne’ebé afetadu ba dezastre naturál, 04 abríl liubá.

Notísia Relevante : Limpeza ba eskola afetadu inundasaun tenke iha koñesimentu MEJD

MEJD distribui materiál limpeza ba eskola lima iha munisípiu Dili, tersa (08/06). Imajen Tatoli/Tomé Amado

Eskola lima ne’e kompostu hosi Eskola Ensinu Sekundáriu Jerál (ESJ) 05 de maiu, Becora, Eskola Ensinu Sekundáriu Jerál 04 setembru, Balide, Eskola Tékniku Vokasionál Hera, Eskola Ensinu Báziku Central Sergio Viera de Melo ho Eskola Ensinu Báziku Central Hera.

Diretora Jerál Administrasaun Finansas, Cecilia Maria Belo de Asís ne’ebé reprezenta Ministru Edukasaun Juventude no Desportu, hateten antes ne’e Governu iha ona planu atu realiza limpeza ba eskola afetadu hitu, inklui eskola lima atu rekupera fali kondisaun iha sala aula no arredores eskola nian. Mezmu nune’e, Ministru Edukasaun to’o ohin loron seidauk deside data fiksu atu hala’o limpeza tanba lakohi kontra regra Ministériu Saúde no Organizasaun Mundiál Saúde (OMS) nian kona-bá luta kontra COVID-19.

 “Materiál limpeza ami distribui ba eskola lima ne’e hamutuk item ualu (8); kada eskola hetan Karoxa neen (6), Kanuru Suru Rai 10, Ai-sar Kesak 10, Ai-sar Masa sia (9), Mop Boraxa Hamaran rai sia (9), enxada 10, Balde  ne’e (6) no botas tahu neen (6),” Cecilia  Maria Belo de Asís  informa ba jornalista-sira iha Edifísiu MEJD, Vila Verde,  Dili, kuarta ne’e.

Nia  husu ba dirijente eskola-sira atu bele organiza ona planu limpeza iha eskola, maibé nia sujere labele halibur ema barak liu, tanba Dili sei kumpre hela konfinamentu obrigatóriu no serka sanitária.

Diretór eskola ESJ 05 de maiu, Becora, Manuel Verdial, afirma sira preparadu ona atu realiza limpeza tanba iha ona komunidade na’in-25 mak preparadu atu apoiu. Nune’e, bainhira MEJD fó ona orientasaun limpeza, maka nia sei organiza komunidade voluntáriu no estudante-sira.

Jornalista : Tomé Amado

Editór        : Francisco Simões

HAKEREK NO HATÁN

Please enter your comment!
Please enter your name here