iklan

NASIONÁL, DESPORTU, DILI

ETO+ hetan direitu eskluzivu halo transmisaun EURO 2021 iha TL

ETO+ hetan direitu eskluzivu halo transmisaun EURO 2021 iha TL

Imajen/ETO+

DILI, 08 juñu 2021 (TATOLI) – Jerente kompañia ETO+, Edmundo Freitas Lopes, informa  ETO+ iha direitu legal halo transmisaun direita ba jogu EURO 2021 tanba manan konkursu públiku iha UEFA (Union of European Football Associations)  2017 ho Right Fee no Technicall Fee $300.000.

“Iha EURO 2016, ami hetan duni kontratu ba televizaun por asinatura, maibé hetan fali hosi  ABU (Asia Broadcasting Union) nia baze iha Malázia, entaun antes ne’e sira mak konkorre lori Timor – Leste nia naran hodi tuir konkursu tanba iha tempu ne’ebá laiha dalan seluk, ami tenke sosa hosi sira, entaun  Euro 2016 remata, ami komesa buka dalan rasik to’o ikus hetan duni no ami kompete fila fali ho ABU iha konkursu publiku ne’e konsege liu faze dala rua haree ba presu ami nian di’ak liu entaun ami mak manán ba dereito territóriu Timor. Ida ne’e dala uluk iha lista UEFA nian hosi Empreza Timoroan ne’ebé konkorre rasik,” Edmundo Freitas Lopes informa ba Agência Tatoli iha nia servisu fatin iha Aimutin, Dili, tersa ne’e.

Nia esplika, bainhira konkorre ba UEFA  lori empreza ETO Telco hodi konkorre ba territóriu Timor-Leste no iha konkursu ne’e ETO+ ho nia plataforma rua; ida mak televizaun por asinatura mak baze iha Dili no sei asiste jogu iha kanál rua ho nia kualidade High Definition (HD).

Ba  tranzmisaun EURO 2021, ETO+ utiliza plataforma; ida maka plataforma  Pay TV uza receiver ETO TELCO no Free to air kanál ETO+ ne’e produtu ETO TELCO nian no (OTT streaming sei koopera ho operadór telekomunikasaun balun).

“Kanál rua ne’e tanba jogu balu iha nia oras hanesan. Maibé ETO+ bele tranzmite jogu rua ne’e dala-ida iha plataforma dijitál no analog. Ami mós iha plataforma televizaun free to air ne’ebé bele asesu iha kanál ETO+ husi antena baibain ka UHF. Tinan ne’e iha Dili espesialmente sira mós bele asesu uza antena li’ur UHF/VHF hanesan sira ne’ebé antes ne’e asesu ba kanál GMN no RTTL uza antena sira hodi asesu ami nia kanál Eto+,” Edmundo esplika.

Kona-bá kanál ETO+ nian ne’ebé Free to air (Transmite sem resepsaun) ka antena baibain komunidade sira iha Atauro, Dili laran no parte hanesan Tibar no Casait nian balu bele asesu. Tanba ne’e, jogu EURO 2021 maske kobertura la kobre iha Timor laran tomak maibé Munisípiu Baucau, Viqueque, Manufahi, Bobonaro no RAEOA sei bele asesu abertura ba jogu Euro nian iha 12 juñu 2021.

“Pergunta agora $300.000 ne’e bele rekupera lae? Ita haree agora kondisaun pandemia COVID-19 empreza barak mak hakdasak, ekonomia ladún la’o, sponsor ladún iha no pandemia ne’e rasik halo ita book an la di’ak, entaun susar uitoan. Ami iha sponsor rua ka tolu nune’e no maioria mai de’it hosi empreza ETO Group de’it  hanesan GOTA ida ne’e mak ami nia sponsor prinsipál  ba Copa EURO 2021 ida ne’e,” Edmundo hateten.

 Laiha lei forte hodi próteze investimentu broadcasting (Pay TV) 

Maski empreza Timor-oan ne’e hetan oportunidade hosi UEFA sai hanesan vensedór EURO 2021 no mós COPA MUNDIAL 2018, maibé  tuir Edmundo, Governu Timor-Leste laiha intensaun di’ak hodi kria lei ruma para halo protesaun direitu eventu mundiál sira-ne’e tanba iha Timor-Leste rasik iha hela operadór satellite seluk husi nasaun viziñu Indonézia ne’ebé tama ilegálmente avontade no livre iha territóriu Timor-Leste tanba lei rai laran rasik la forte hodi próteze investimentu sira ne’e.

“Bainhira ne’e mosu ami empreza lokál sira mak sai nafatin vítima. Empreza Timor-oan sira iha hanoin di’ak atu investe ho folin ne’ebé kompetitivu,” nia informa hodi sujere mós ba Governu tau ona atensaun ba asuntu hirak hanesan ne’e hodi aselera Lei broadcasting iha futuru.

Jornalista     : Hortencio Sanchez

Editór            : Francisco Simões

iklan
iklan

2 Comments

  1. Eto Telco
    Tamba saida mk to agr la sai Jogu ne?
    Ami sosa ona pulsa ne!
    Produto local mk hnesan ne fli k?

Leave a Reply

iklan
error: Content is protected !!