Sekretáriu Estadu Juventude no Desportu, Abrão Saldanha. Imajen TATOLI/Egas Cristovão

DILI, 08 juñu 2021 (TATOLI) – Sekretáriu Estadu Juventude no Desportu (SEJD), Abrão Saldanha, hateten atividade desportu iha Timor-Leste importante tebes, maibé kontinua suspende tanba propagasaun COVID-19 tama ona iha faze tranzmisaun komunitária.

“Atividade desportu ne’e importante tebes ba ita nia rain no ba ita nia saúde, maibé ho konfinamentu obrigatóriu no serka sanitaria ne’e limita ita atu labele hala’o atividade sira ne’ebé halibur ema barak, tanba desportu ne’e halibur ema barak, ita-nia situasaun tama iha tranzmisaun komunitária,” Sekretáriu Estadu Abrão Saldanha hateten ba Agência Tatoli iha edifísiu SEJD Lecidere, Dili, tersa ne’e.

Nia dehan, Timor-Leste labele implementa hanesan nasaun seluk iha Europa no seluk tan tanba ema nia kondisaun infraestrutura  mais avansadu.

“Iha Timor – Leste ita nia infraestrutura seidauk sufisiente hodi realiza eventu desportu sira ho di’ak liu sem prezensa ema nian hanesan Europa ne’ebá estádiu di’ak, ema iha infraestrutura televizaun di’ak tanba ema bele joga iha estádiu laran depois adeptu-sira akompaña de’it hosi uma, mais ita nian seidauk to’o nivel ida ne’e. Se kuandu ita realiza duni jogu ruma difisil atu trava netik ema ba asiste, ho nune’e mak Governu sei suspende hela atividade desportu hotu,” Abrão Saldanha esklarese.

Nia hatutan, solusaun ba ida ne’e mak ema hotu tenke partisipa iha vasina ne’ebé Governu prepara ona. “Bainhira ita nia komunidade iha Dili laran hetan ona vasina to’o 80% ona, signifika komunidade Dili iha ona imunidade sufisiente hasoru virus ne’e, entaun ita bele hala’o fali atividade sira-ne’e hanesan uluk,” nia tenik.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here