Membru KKM vota ba ajenda asembleia iha CCB, Villa antiga Baucau, segunda (07/06). Imajen TATOLI/Natalino Belo

BAUCAU, 07 juñu 2021 (TATOLI)—Líder Komunitáriu munisípiu Baucau sira realiza reuniaun asembleia Konsellu Konstrutivu Munisípiu (KKM), ho tema ‘Planu asaun annuál abrodajen integradu jéneru, ne’ebé realiza iha Sentru Konvensaun Baucau (CCB, sigla portugés).

Ajenda importante haat ne’ebé membru sira diskute mak hanesan, prevensaun no mitigasaun COVID-19 iha munisípiu Baucau, planu asaun annuál abordajen intergradu jéneru, planeamentu dezenvolvementu munisípiu Baucau 2022, no prespetiva kona-ba sosiu-ekonómiku iha Baucau.

“Nu’udar Prezidente Autoridade, ha’u aprova reuniaun Konsellu Konstrutivu munisípiu Baucau nian,” Prezidente Autoridade munisípiu Baucau, Olívio ‘Bou Lesa’, hateten iha abertura sesaun asembleia, CCB, Villa antiga Baucau, segunda ne’e.

Reuniaun ne’e foin mak realiza ba dahuluk tanba autoridade munisipál ne’e foin simu pose no asume knaar foun iha janeiru 2021.

Objetivu hosi reuniaun ne’e atu rona hanoin no simu proposta hosi membru sira hodi halo planu asaun, nune’e bele implementa iha munisípiu Baucau.

Ajenda haat ne’ebé aprezenta maioria membru sira vota a-favór no meza konsidera hodi kontinua halo diskusaun no simu proposta hosi membru sira hamutuk na’in-61.

Membru KKM kompostu hosi xefi suku 59 hosi munisípiu Baucau, Konsellu Kombatente Libertasaun Nasionál Baucau (CCLN, sigla portugés), konviksaun relijioza, akadémiku, reprezentante hosi partidu, organizasaun juventude, organizasaun promosaun feto, setór privadu, ne’ebé lidera direta hosi Prezidente Autoridade munisípiu Baucau, Olívio ‘Bou-Lesa’ Freitas.

Jornalista: Natalino Belo

Editora: Julia Chatarina

HAKEREK NO HATÁN

Please enter your comment!
Please enter your name here