SEFOPE despede traballadór timor-oan ba Korea Súl, iha salaun Senae Becora, kinta (03/06). Imajen TATOLI/Natalino Costa

DILI, 03 juñu 2021 (TATOLI)—Sekretaria Estadu Formasaun Profisionál no Empregu (SEFOPE) despede traballadór timor-oan na’in-70, ne’ebé aban (04/06) sei aranka ho aviaun Air Asia, bá Korea Súl hodi serbisu durante tinan-haat.

“Kestaun haruka ita-nia traballadór sira paradu iha tinan 2020 tanba COVID-19, entaun ohin Governu Korea komesa loke filafali oportunidade ba Timor-Leste hanesan país daneen ne’ebé maka bele haruka traballadór ba Korea Súl, tanba ne’e ohin ita halo seremónia despedida ba ema hamutuk 70,” Diretór Jerál Empregu hosi SEFOPE, Paulo Alves, informa iha Senae Becora, kinta ne’e.

Traballadór ne’ebé maioria mane, foin mak atu serbisu ba dahuluk, ne’ebé na’in-46 sei serbisu iha área peska no seluk iha área fábrika.

“Tuir loloos sira ne’ebé atu bá na’in-80, maibé tanba aviaun prevee fatin ba ema na’in-70 de’it, maka na’in-10 seluk depois mak tuir iha jullu nia laran,” nia akresenta.

SEFOPE no reprezentante hosi Embaixada Korea iha Timor-Leste, hato’o mensajen bá traballadór na’in-70 ne’ebé aban atu aranka ba Korea Súl, iha salaun Senae Becora, kinta (03/06). Imajen TATOLI/Natalino Costa

Traballadór hirak ne’e submete ba teste PCR no aban sei simu rezultadu molok atu arranka.

“Uluk seidauk tama situasaun COVID-19, bainhira atu arranka presiza teste saúde de’it, maibé agora presiza teste PCR, ne’ebé kuandu deteta pozitivu tenke adia viajen. Bainhira to’o Korea, traballadór sira sei submete ba kuarentena loron 14,” nia hatutan.

Nune’e, Dirijente ne’e enkoraja traballadór sira hatudu komportamentu di’ak hodi koopera ho empreza ne’ebé serbisu ba, nune’e bele dada ema nia atensaun no iha futuru fó oportunidade ba traballadór timor-oan seluk serbisu iha Korea Súl.

Iha biban hanesan, Sekretáriu Estadu Formasaun Profisionál no Empregu, Alarico do Rosario, husu traballadór labele halo problema iha ema-nia rai.

“Ita la’ós atu ba serbisu de’it, maibé reprezenta mós identidade nasaun,” governante ne’e subliña.

Nia dehan, polítika Governu mak atu hamenus dezempregu iha Timor-Leste, tanba ne’e husu traballadór sira tenke kumpre nafatin regra no prosedimentu ne’ebé maka iha, atu nune’e ba futuru bele aumeta kouta Governu Timor-Leste haruka traballadór bá Korea Súl.

Iha fatin hanesan, Reprezentante Governu Korea iha Timor Leste, Jooyun Yang, hateten, daudaun ne’e iha nasaun hamutuk 16 mak nia traballadór sira serbisu iha korea, maibé tanba situasaun COVID-19, Korea simu nasaun lima de’it inklui Timor Leste.

Entretantu,  traballadór na’in-70 halo deklarasaun katak sei halo serbisu tuir nafatin prosedimentu nasaun Timor-Leste no sai sasin família hosi traballadór rasik.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here