Komandante Operasaun PNTL Nasionál Superintendente Xefe Pedro Belo, hala’o enkontru avaliasaun serbisu serka sanitária iha Kapital ho Xefe Departamentu no Seksaun Komandu Jerál iha Kuartél Jerál PNTL, kuarta (02/06/21). Imajen/PNTL.

DILI, 02 juñu 2021 (TATOLI)— Polísia Nasionál Timor Leste (PNTL), munisípiu Dili enfreta difikuldade atu bele hala’o patrullmentu durante implementasaun Estadu Emerjénsia (EE), Serka Sanitária (SS) no Konfinamentu Domisiliáriu (KD).

Difikuldade ne’e parte komandu munisípiu Dili aprezenta durante avaliasaun hamutuk ho ekipa konjunta Komandu Jerál PNTL, Sentru Formasaun Akademia Comoro no Komandante eskuadra-sira, iha Caicoli, kuarta ne’e.

Notísia relevante:Governu sei entrega karreta 21 ba PNTL

“Enkontru ne’e hodi avalia progresu no dezafiu serbisu durante asegura EE, SS no KD. Iha enkontru ne’e, membru sira aprezenta difikuldade menus transporte, lojístika no laiha fasilidade serbisu seluk ne’ebé sei hato’o ba Komandu Jerál atu buka solusaun,” Komandante munisípiu Dili, Superintendente Xefe, Herique da Costa hateten.

Superintendente Xefe, Herique da Costa esplika, liu hosi ekontru ne’e diskute no haree liu dezafiu serbisu membru sira-nian hodi buka solusaun no hadi’a faillansu ruma iha terrenu.

Komandu mós alerta ba komandante-sira atu orienta membru-sira ne’ebé halo seguransa iha pontu entrada haat, Tasi-tolu, Manleuana, Lahane no Metinaro atu kontrola abitante-sira ne’ebé halo movimentu tenki kumpre nafatin regra no labele mosu tan kazu agresaun fíziku hasoru abitante ka negosiante-sira

Komandante Henrique da Costa mós enkoraja membru-sira atu labele lakon esperansa ho kazu ne’ebé akontese ona, maibé iha nafatin espíritu nasionálizmu hodi serbisu ho profisionál.

Governu liuhosi Ministériu Interiór (MI), sei entrega karreta hamutuk 21 ba instituisaun Polísia Nasionál Timor Leste (PNTL) iha tempu badak.

Daudaun-ne’e membru efetivu iha munsípiu Dili hamutuk 400-resin ne’ebé hetan apoiu hosi membru PNTL Manatuto, Liquiça no Aileu hodi asegura kapitál Dili inklui kuarentena no izolamentu.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here