Komandante Jerál PNTL, Komisáriu Polísia, Faustino da Costa fó pose ba Diretór Serbisu Informasaun Polísia (SIP), Superintendente Polísia, Boavida Ribeiro. Imajen/Ministériu Interiór.

DILI, 01 juñu 2021 (TATOLI)—Komandu Jerál Polísia Nasionál Timor-Leste (PNTL), nomeia atuál Diretór Serbisu Informasaun Polísia (SIP), Superintendente Xefe, Hermenegildo Gonçalves Alves ba asume kargu foun nu’udár adidu seguransa iha Austrália no fó pose ba Segundu Komandante Akademia Polísia Comoro, Superintendente Polísia, Boavida Ribeiro hodi lidera hikas SIP.

Serimónia pose ba Komandante SIP, Boavida Ribeiro ho númeru ID-10073 dirije hosi Komandante Jerál PNTL, Komisária Polísia, Faustino da Costa akompaña hosi ofisiál superiór-sira PNTL nian tuir despaixu númeru 209/CG-PNTL/V/2021.

Notísia relevante:COVID-19, TL-Indonézia-Austrália hametin seguransa

Komisáriu Polísia Faustino da Costa konsidera nomeasaun ba kargu ne’e hala’o tuir planu no programa nasionál dezenvolvimentu instituisaun PNTL.

“PNTL nomeia membru-sira asume kargu, mínimu tinan ida to’o tinan rua labele to’o tinan 10. Komandante Hermenigildo substitui adidu seguransa iha Austrália, tanba ne’e koloka fali ofisiál balun ba SIP,” Komisáriu Faustino da Costa, hateten ba jornalista-sira iha Komandu Jerál PNTL, Caicoli, tersa ne’e.

Líder másimu PNTL ne’e husu atu Komandante SIP serbisu makaas, koordena ho komandante unidade no munisípiu-sira hodi fó susesu ba kualkér serbisu ne’ebé iha ona.

Iha fatin hanesan, Komandante SIP, Superintendente Boavida Rebeiro liu hosi termu juramentu, prontu kolobora hodi hala’o serbisu tuir órden Komandu PNTL.

Nia konsidera knaar foun ne’ebé asume nu’udár responsabilidade todan, maibé fiar katak, serbisu ekipa ho sólidu sei fó rezultadu no kontribui informasaun di’ak ba instituisaun PNTL.

Boavida Ribeiro sei hala’o knaar hahú 01 juñu 2021 tuir lei númeru 2 artigu 34-PNTL to’o misaun termina, enkuadnu Superintendente Xefe, Hermegildo Gonsaçalves Alves asume kargu adidu seguransa iha Austrália hodi troka adidu sesante, Komisáriu Polísia, Afonso  de Jesus ne’ebé termina ona mandatu.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here