Aktividade vendedór fa’an ai-han lokál iha bazar tradisionál iha kapitál Dili, 16 outubru 2020. Imajen TATOLI/António Gonçalves

DILI, 31 maiu 2021 (TATOLI)--Parlamentu Nasionál (PN) liuhosi Komisaun D, ne’ebé trata asuntu Ekonomia no Dezenvolvimentu, husu Governu atu prepara dekretu-lei kona-ba seguransa alimentár hodi garante kualidade ai-han iha Timor-Leste.

“Ami Rekomenda ba Governu, atu tau konsiderasaun prepara lejizlasaun sira hanesan rejime jerál kontra ordenasaun no dekretu-lei kona-ba seguransa alimentár, tanba ita hakarak fó kontinuidade ba prosesu sira ne’ebé aprezenta rekursu ba tribunál no dekretu-lei seguransa alimentar, liu-liu liga ba kualidade ai-han no bele kria rasik padraun ba ai-han, atu nune’e bele iha kontrolu ba ai-han,” Prezidente Komisaun D, Deputadu Antoninho Bianco, hateten iha sala plenária PN, segunda ne’e.

Rekomendasaun ne’e ho baze ba relatóriu vizita traballu Komisaun D ba Autoridade Inspesaun no Fiskalizasaun ba Atividade Ekonómika, Sanitária no Alimentár (AIFAESA).

Durante vizita traballu, Komisaun D nota katak seidauk iha lei seguransa alimetár ne’ebé bele regula kona-ba food sheet atubele kria derivasaun dekretu-lei sira kona-ba rotulajen, kualidade ai-han no bele kria rasik padraun ba ai-han atubele iha kontrolu iha rai laran.

Tuir orgánika VIII Governu nian, AIFAESA ne’ebé tutela ba Ministériu Kordenadór Asuntu Ekonómiku (MKAE), ho misaun prinsipál atu asegura atividade kontrolu ba kualidade ai-han.

Nune’e mós, autoridade ne’e responsabiliza atu haree kondisaun transporte, produsaun lokál atu garante komersializasaun ba produtu ai-han, eleminasaun ba produtu ai-han hodi diminui no prevene risku saúde públika.

Nune’e, Prezidente Komisaun D  rekomenda mós  ba Governu atu tau iha planu orsamentu annuál hodi konstrui laboratóriu no armazem ba AIFAESA.

“Ita-nia Governu presiza duni instala laboratóriu nasionál ai-han hodi fasilita kontrolu kualidade, liuliu ai-han importadu,” nia akresenta.

Tuir Deputadu Bankada Governu ne’e, kona-ba armazen AIFAESA, MKAE prevee ona iha Orsamentu Jerál Estadu (OJE) 2021 hodi halo instalasaun, nune’e asegura produtu sira ne’ebé halo apreensaun.

Komisaun D mós rekomenda ba Governu, atu prepara lejizlasaun kona-ba kuadru institutu públiku hodi regula institutu públiku hotu iha Timor Leste.

Hanoin ne’e tanba haree bainhira laiha lejizlasaun  ne’e maka sei iha implikasaun ba funsionáriu ne’ebé serbisu iha instituisaun ida, hetan formasaun lubuk, maibé hetan oferta remunerasaun di’ak mai hosi fatin seluk, entaun deside sai ou muda.

Orsamentu tinan ne’e ba MKAE hamutuk millaun $1,6 ne’ebé fahe ba programa jestaun kontrolu atividade ekonómika hamutuk $1.002.234 (76% hosi totál) no programa boa governasaun inklui jestaun institusionál ho montante $347.000 ( 23%).

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here