Forsa Humanista Timor-Leste (FHTL). Imajen Tatoli/Arminda Fonseca

DILI, 31 maiu 2021 (TATOLI)-Forsa Humanista Timor-Leste (FHTL) husu ba Governu liuhosi Ministériu Edukasaun Juventude no Desportu (MEJD) atu reativa aprendizajen iha eskola-sira iha Timor laran tomak.

Portavós FHTL, Luis Mota hateten MEJD presiza reativa permanente prosesu aprendizajen tanba preokupa implementasaun eskola ba uma ninia efetividade ne’ebé mak prejudika kualidade no kuantidade alunu-sira hosi pre-eskolár to’o institutu superiór.

FHTL haree katak fatór lubuk ida mak la fó kondisaun ba inan-aman atu apoiu nesesidade estudante-sira nian, hanesan atu sosa pulsa telefone, sosa telefone ka android, televizaun no rede internet la sufisiente ba prosesu aprendizajen iha nivel nasionál, munisípiu to’o área remotas.

“Ami lamenta ho eskola online iha situasaun Estadu Emerjénsia, Serka Sanitária (SS) no konfinamentu obrigatóriu, tanba ne’e mak FHTL propoin ba Governu atu solusiona mak husu MEJD reativa permanente aprendizajen iha Timor laran tomak tuir medida no kapasidade ministériu nian,” Luis Mota, hateten liuhosi konferénsia imprensa  iha sede FHTL Ailok-laran, Dili, segunda ne’e.

Hosi aspetu saúde nian, FHTL konsidera katak servisu nivel ministeriál la integradu atu garantia imunidade povu nian iha situasaun pandemia COVID-19, tanba rezulta hamlaha no laiha nutrisaun ba povu nia imunidade atu kontra inimigu invizivel ida-ne’e.

FHTL mós konsidera Governu laiha seriedade atu halo jestaun ba prevensaun COVID-19 iha Timor-Leste, liuhosi medida prevensaun Estadu Emerjénsia, serka sanitária no konfinamentu obrigatóriu tanba kada loron kazu pozitivu kontinua aumenta ba beibeik.

“Ho ida ne’e ami husu Governu atu hadi’a servisu entre liña ministeriál, hodi bele garantia imunidade iha situasaun pandemia COVID-19, no Governu tenke sériu hodi avalia medida prevensaun anteriór-sira hanesan, EE, SS no konfinamentu obrigatóriu hodi bele foti desizaun ne’ebé kondís ho situasaun reál,” Luis Mota hateten.

Ba aspetu seguransa nian, FHTL aprezenta sira-nia lamentasaun ho atitude no atuasaun Ajente Polísia Nasionál Timor-Leste (PNTL) nian balun ne’ebé akontese beibeik ona hanesan kazu  Kuluhun, Manufahi, Covalima, Mascarinhas, no atuasaun ne’ebé mak kontinua repete iha Tasi-Tolu hasoru vendedór  Octaviano Thal iha loron, 23 maiu liubá.

Ho atuasaun sira mak nia haktuir, estudante no juventude ne’ebé hamahan-an iha FHTL konsidera katak, atuasaun hosi Ajente  PNTL hirak-ne’e la respeitu ba farda ne’ebé sosa hosi ruin no ran povu nian.

“Ami husu ba oknum PNTL atu halo atuasaun iha públiku tenke mai ho atitude umanizmu hodi refleta ba lema PNTL nian, “server e proteger”, no Konstituisaun Repúblika Demokrátika Timor-Leste iha artigu, 147, númeru rua katak, prevensaun kriminál tenke hala’o ho respeitu ba direitu umanu.

Iha aspetu ekonomia, FHTL mós diskorda ho medida EE, SS no konfinamentu obrigatóriu, tanba hodi rezulta númeru dezempregu sa’e maka’as, no mós rendimentu familiár tun kada loron, au-mézmu tempu agrikultór sira-nia produtu la folin no empregadór barak lakon servisu.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here