Conselho de Imprenasa relata rezultadu monitorizasaun liuhosi konferénsia imprensa. Imajen TATOLI/Osória Marques.

DILI, 28 maiu 2021 (TATOLI)—Prezidente Konsellu Imprensa (CI, sigla portugés), Virgílio da Silva Guterres, husu ba mídia ne’ebé iha programa ho karaterístika relijioza atu promove mensajén espirituál.

“Ami identifika programa balun ne’ebé karaterístika relijioza nian, hanesan iha Rádiu Televizaun Timor-leste (RTTL) ‘Hametin Fiar no Roman Domin”. Ita Timor-Leste komunidade Katólika iha 97.7%, no RTTL iha previléjiu hodi fó sai loron 13 maiu ka domingu baibain halo transmisaun maibé mós ita labele haluhan katak Timor mós iha relijiozu seluk,” Virgílio da Silva Guterres, hateten liuhosi konferénsia imprensa bainhira relata rezultadu monitorizasaun CI nian, iha salaun CI Kintal Boot, sesta ne’e.

La’ós atu fó sai misa ka mensajén semana-semana hosi relijiaun seluk nian maibé pelumenus bainhira sira komemora sira-nia loron boot ruma, RTTL hanesan mídia públiku inklui mídia nasionál sira fó oportunidade ba sira atu sira mós bele transmite mensajén ba sira-nia komemorasaun sira-ne’e.

“Komunidade musulmanu hosi rai-laran no foun mós iha, protestante iha Timor barak inklui Hindu no Budha mós iha hotu. Tanba ne’e, presiza fó espasu no oportunidade ba relijiaun sira hotu hodi bele transmite mensajen espirituál relijiaun ida-idak nian iha sira-nia loron boot sira,” nia dehan.

Nia hateten, bainhira fó ona fatin ba relijiaun ida mak tenke iha espasu hanesan ba seluk.

Virgilio husu ba RTTL promove pluralizmu, diversifidade kulturál no fiar ne’ebé ita-nia Konstituisaun garante.

Ho kestaun hirak ne’e hotu, rekomenda ba meis komunikasaun sosiál hotu atu promove pluralizmu liuhosi fó biban no espasu ba relijiaun hotu-hotu iha país ne’e atu transmite no públika sira-nia programa ka mensajén ruma.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here