Ministru Obra Públika, Salvador Eugênio dos Reis Pires, tau semente ba rai kuak, ne'ebé atu harii riin elestrisidade iha suku Rairobo, kinta (27/05). Imajen TATOLI/Antónia Gusmão

BOBONARO, 27 maiu 2021 (TATOLI)Ministru Obra Públika (MOP), Salvador Eugênio dos Reis Soares Pires, halo lansamentu tau fatuk dahuluk ba projetu konstrusaun liña distribuisaun eletrisidade baixa no média tensaun iha suku Rairobo, postu administrativu Atabae, munisípiu Bobonaro.

“Ohin kontinua realizasaun projetu eletrifikasaun, ne’ebé suku 76 mak seidauk asesu. Suku Rairobo rasik hanesan projetu importante, ne’ebé inisia kedan iha tinan 2020 tanba ita iha postu Unidade Patrullamentu Fronteira (UPF) ida ho kapasidade kama 500, maibé liña eletrifikasaun laiha,” Ministru hateten hafoin ramata seremónia lansamentu, iha suku Rairobo, kinta ne’e.

Molok ezekuta projetu ne’e, liu prosesu naruk tanba tenki hetan aprovasaun hosi Komisaun Nasionál Aprovizionamentu (CNA, sigla portugés), hafoin MOP, Ministériu Planu no Ordenamentu (MPO), Konsellu Administrasaun Fundu Infraestrutura (KAFI) ne’ebé serbisu hamutuk ho ekipa Eletricidade de Timor-Leste, Empreza Públika (EDTL, E.P) realiza lansamentu.

“Ha’u agradese ekipa interministeriál nia esforsu,  hamutuk ho ami-nia ekipa EDTL,E.P hodi bele realiza lansamentu, espera katak bele realiza iha fulan rua ka tolu hodi komunidade sira bele asesu,” nia akresenta.

Iha fatin hanesan, Administradór postu administrativu Atabae, Pedro Lakubuti, apresia ho inisiativa ne’e, tanba desde Timór ukun-an durante tinan 21 ona, populasaun iha suku rua iha postu ne’e seidauk asesu eletrisidade.

“Sente orgullu no kontente tebes ho lansamentu eletrifikasaun ba suku Rairobo, tanba ita-nia populasaun tomak hein kleur ona,” nia dehan.

Tuir Autoridade postu ne’e, projetu eletrifikasaun ne’e sei benefisia família hamutuk 320 resin, hosi aldeia tolu iha suku Vila Maria, Atabae no Lolokolo.

“Eletrifikasaun sei fó benefísiu ba populasaun aldeia Lolokolo purvolta xefe família 100 resin no aldeia Rairobo inklui aldeia Vila Maria purvolta xefe família 220 resin,” nia akresenta.

Projetu ne’e responsabiliza hosi kompañia lokál Esmelia unipessoal Lda, ho kustu projetu hamutuk $411.806,78, ne’ebé sei ramata iha 02 novembru tinan ne’e.

Seremónia lansamentu ne’e, partisipa hosi Prezidente Konsellu Administrasaun EDTL, E.P, Paulo da Silva, Prezidente Institutu Jestaun no Ekipamentu (IGE, sigla portugés), Prezidente Autoridade munisípiu Bobonaro, Zeferino dos Santos, Komandante Polísia Munisipál Bobonaro, populasaun Atabae, autoridade lokál inklui entidade relevante.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here