Tékniku EDTL halo instalasaun ba liña distribuisaun eletrisidade iha Dili, kinta (04/03). Imajen TATOLI/António Gonçalves

BOBONARO, 27 maiu 2021 (TATOLI)Eletricidade de Timor-Leste, Empreza Públika (EDTL, E.P) planeia atu monta kontadór hamutuk 85.000 iha territóriu tomak ho razaun bele rekolla reseita di’ak liután ba kofre Estadu.   

Prezidente Konsellu Administrasaun, EDTL, E.P, Paulo da Silva, hateten, daudaun ne’e konsentra hela atu redúz kustu produsaun enerjia tanba kada tinan empreza estatál ne’e gasta millaun $106 atu sosa konbustível ba sentrál elétrika.

“Ami tenke hahú introdúz katak ema uza enerjia, tenke kontribui garante funsionamentu sentrál ne’e la’o nafatin no garante fasilidade atu funsiona ho di’ak, presiza osan halo manutensaun, entaun presiza kontribuisaun. Entaun EDTL sei monta kontadór 85.000 iha territóriu tomak, atu nune’e ajuda kontrolu uzu enerjia no hasa’e reseita nesesidade eletrisidade,” Prezidente Konsellu Administrasaun, EDTL,E.P, informa iha ámbitu lansamentu projetu eletrifikasaun iha suku Rairobo, munisípiu Bobonaro, kinta ne’e.

Instalasaun pre-pagu hamutuk 85.000 ne’ebé ho kustu millaun $3 resin ne’e, ho hanoin ida mós atu redúz konesaun ilegál.

Tuir lista hosi EDTL,E.P, iha tinan 2019 hatudu uma-kain ne’ebé dada eletrisidade ilegál hamutuk 30.000 tanba laiha kontadór pre-pagu.

Aleinde ne’e, atu redúz kustu kombustível ba enerjia eletrisidade, iha tinan 2021 hahú halo estudu atu konverte gazoel ba gás.

Tuir Dirijente ne’e, kustu ba kombustível boot liu kompara ho reseita EDTL, E.P, ne’ebé kada tinan la to’o $40.

Iha tinan 2020 konsege rekolla reseita millaun $35.

EDTL, E.P sei hadi’a sistema kontrolu no sei prodúz regra sira, tanba ne’e maka Autoridade Nasionál Eletrisidade (ANE) sei ajuda kria baze legál sira, atu nune’e bele orienta jere setór eletrisidade rasik.

Nune’e mós, sei konsentra atu mellora ba liña distribuisaun sira, tanba agora daudaun fasilidade sira ne’ebé iha liña distribuisaun manuál, ne’ebé dala ruma kuandu iha fallansu tékniku tenke buka tuir fallansu ne’e.

“Ida-ne’e la efetivu tanba tékniku sira gasta tempu no kustu barak,” nia akresenta.

Ho nune’e, EDTL, E.P planeia halo dijitalizasaun hodi moderniza liña distribuisaun, ne’ebé hahú ona estudu viabilidade iha tinan ne’e no durasaun tinan-tolu atu konklui.

Bazeia ba lei númeru 33/2016, 16 agostu, ko’alia kona-ba tarifa EDTL, E.P inklui koima sira, katak kliente hotu bainhira uza enerjia eletrisidade tenke selu ka sosa pre-pagu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here