Komunidade simu Ministru Turizmu, Komérsiu no Indústria, José Lucas do Carmo da Silva no Vise-Ministra Turizmu Komunitária no Kulturál, Inácia da Conceição Teixeira, iha Nunu-Mogue. Imajen/MTKI

DILI, 25 maiu 2021 (TATOLI)–Ministériu Turizmu, Komérsiu no Indústria (MTKI) lansa sub-programa dezenvolvimentu no estabelesimentu grupu traballu turizmu komunitáriu, iha suku Nunu-Mogue, postu administrativu Hato-Builico, munisípiu Ainaro.

Ministru Turizmu, Komérsiu no Indústria, José Lucas do Carmo da Silva, hateten, estabelesementu grupu traballu nu’udar pasu importante atubele mellora konseitu turizmu komunitáriu.

“Objetivu vizita suku ne’e hodi fó tomada pose ba Prezidente no membru Konsellu Konsultivu, inklui estabelese grupu traballu turizmu komunitáriu tanba turizmu komunitáriu nia konseitu  maka komunidade tenke sai na’in ba dezenvolvimentu turizmu ne’e,”  Ministru José Lucas, hateten iha diskursu lansamentu ne’ebé Agência TATOLI asesu, tersa ne’e.

Notísia relevante: PM Orienta Vise-Ministra Inácia Integra Komunidade Iha Turizmu Komunitáriu

Tuir Ministru, grupu traballu no membru sira ne’ebé simu pose iha papel importante tanba simu responsabilidade hodi hamosu ideia no atividade konseitu orijen turizmu iha suku Nunu-Mogue.

Iha seremónia ne’e, Ministru José Lucas, hamutuk ho Vise-Ministra Turizmu Komunitária no Kulturál,  Inácia da Conceição Teixeira, fó pose ba Prezidente ho membru Konsellu Konsultivu na’in-neen inklui mós grupu Ast Rabeka, ne’ebé simu pose nu’udar Grupu Traballu Turizmu Komunitáriu iha suku Nunu-Mogue.

Enkuantu, Xefe Suku Nunu-Mogue, Hilário da Conceição, apresia no agradese ho vizita Ministru no Vise-Ministra hodi implementa projetu turizmu komunitáriu iha suku.

Antes ne’e, Primeiru-Ministru, Taur Matan Ruak, fó ona orientasaun serbisu ba Vise-Ministra Inácia da Conceição atu integra komunidade iha prosesu turizmu komunitáriu.

Governu estabelese ona turizmu komunitáriu iha fatin lima hanesan iha suku Com iha Lautém, Mota Bandeira iha Ermera, Bee Manas Marobo iha Bobonaro, Rekiraka iha Viqueque no Seloi Kraik iha Aileu.

Iha tinan 2017,  Governu aprova Polítika Nasionál Turizmu, ne’ebé dezenvolve atu kria kuadru klaru kona-ba polítika públika, ne’ebé importante atu asegura kreximentu efetivu, efisiente no sustentável hosi setór turizmu.

Setór turizmu tama iha setór lima ne’ebé konsidera hanesan prioridade ba kreximentu no diversifikasaun ekonómika Timor-Leste.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here