Ministru Petróleu no Minerál, Víctor da Conceição Soares. Imajen Tatoli/Egas Cristovão

DILI, 24 maiu 2021 (TATOLI)—Ministru Petróleu no Minerál (MPM) Víctor da Conceição Soares, husu ba reprezentante povu iha uma fukun Parlamentu Nasionál atu halo aprovasaun ba projetu-lei kódigu mineiru iha finál globál.

Ministru Víctor da Conceição Soares, fó apresiasaun ba fó apresiasaun ba Parlamentu Nasionál, ne’ebé konsege finaliza ona projetu-lei ne’e iha faze espesialidade no oras ne’e tama ona diskusaun finál globál.

“Projetu-lei ne’e fila-fali ba plenária ida-ne’e no husu mós ba deputadu sira hotu atu bele aprova lei ida-ne’e, ami hanesan ezekutivu hakarak ezekuta duni iha tempu besik, faze tuir mai sei halo sosializasaun iha baze no depois sosializaaun hotu sei halo tán projetu-lei ba Fundu Mineiru atu nune’e ita bele ezekuta no ita hakarak introdús fundu alternativu hodi substitui fundu petrolíferu,” Ministru Víctor da Conceição Soares, ko’alia molok deputadu sira aprova projetu-lei iha finál globál, iha PN, segunda ne’e.

Governante ne’e konsidera projetu-lei ne’e importante tebes tuir planu governu nian hakarak fó duni prioridade tanba fundu minarai tún ba beibeik.

“Nune’e ita bele promove fali fundu alternativu atubele garante ita-nia sustentabilidade ekonómika iha futuru. Ho ida-ne’e ita kompromete katak ita bele fó kampu traballu, ita bele estimula ita-nia ekonomia nasaun nian,” nia katak.

Konteúdu hosi Projetu-Lei Kódigu Mineiru ne’e atu regula atividade minerál nian inklui atividade rekoñesimentu preliminár, prospesaun bá-oin no peskiza, avaliasaun, dezenvolvimentu, esplorasaun no tratamentu iha área mineral rai-laran nian.

Nune’e mós transporte no komersializasaun minerál hodi haree fila-fali importánsia ba estadu RDTL, liuliu kuandu atende impaktu no fornesimentu ba matéria prima sira, esensiál ba dezenvolvimentu, kresimentu ekonómiku no prosperiedade nasaun nian.

Projetu-Lei Kódigu Mineiru hamutuk artigu 162 ho kapítulu 20 no anexu 3. Artigu 1 define aprovasaun kódigu mineiru, artigu 2 define polítika mineira, artigu 3 define objetivu sira kona-ba estratéjia setór mineiru nian no ikus liu artigu 162 ne’ebé define dispozisaun tranzitória. Lei ne’e vigora bainhira kompleta loron 180 ne’ebé públika hosi Jornál Repúblika.

Proponente ba Projetu-Lei ne’e mak hanesan Deputada Virgínia Ana Belo, Deputadu Duarte Nunes, Adérito Hugo da Costa, Francisco de Vasconcelos, António Nobre Tilman, Maria Fernanda Lay, Maria Terezinha Viegas, Mariano Assanami Sabino, António da Conceição no Maria Angelina.

Purtantu iha loron 30 jullu 2020 liubá, reprezentante povu sira aprova projetu-lei nú 4/V(1a)-Kódigu Mineiru ho rezultadu votasaun a-favór 54 kontra 0 no abstensaun 0.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here