Pesoál saúde fó vasina AstraZeneca inan-feton ida iha Sentru Saúde Bairro Formosa, Dili, sesta, (21/05). Imajen TATOLI/António Gonçalves

DILI, 21 maiu 2021 (TATOLI)—Sala Situasaun, Sentru Integradu Jestaun Krize (SIJK), rejista kazu pozitivu COVID-19 foun hamutuk 172, rekoperadu 95 no kazu ativu 2.469.

“Kazu foun 172, mai hosi Dili 155 no munisípiu-sira iha 17 kompostu hosi mane 106 no feto 66,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liu hosi komunikadu, sesta ne’e.

Notísia relevante:COVID-19: pozitivu 172, rekoperadu 76 no ativu 2.398

Hosi totál kazu detetadu foun ohin, ho idade 12 mai kraik iha na’in-ida, idade entre 12-59 na’in 170 (98,8%), idade 60 mai kraik iha na’in-ida ne’ebé proporsaun kazu sintomátiku hamutuk 2,3%.

Kumulativu kazu konfirmadu sura hosi 21 marsu 2020 to’o 21 maiu 2021 hamutuk 5.287. Hosi horisehik mai ohin, teste ne’ebé Laboratóriu Nasionál Saúde halo hamutuk 683 PCR, ho detallu hanesan tuir-mai, Vijilánsia sentinela 43, rastreiu ba kontaktu ka Contact tracing 84, Rastreiu Aleatóriu ka Random Screening 24, Viájen sai-hosi serka sanitária hosi Dili 480, Viájen internasionál haat, Follow up iha kuarentena 48.

Totál testes PCR ne’ebé halo horisehik 18 maiu iha munisipiu-sira seluk, RAEOA no HNGV hamutuk 533,  ho detalla hanesan tuir-mai, Maubisse 110, Maliana 59, Viqueque 61, Suai 158, Baucau 23, Ermera 42, RAEOA ida no HNGV 79.

Atu bele hatene surtu ida ninia evolusaun no mós surtu ne’e aumenta ka diminui, indikadór seluk ne’ebé matenek-na’in epidemiolojia-nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et moras ida.

Hosi insidénsia COVID-19 iha Timor-Leste, durante loron hitu ikus maka 12,6/100 mil abitante, enkuantu ba de’it munisípiu Díli 38,9/100 mil abitante.

Insidénsia iha leten, sei nafatin hatudu katak, munisipiu Dili mak fatin ho risku bo’ot liu atu populasaun hetan da’et no hada’et tutan virus SARS-CoV-2.

Ilustrasaun seluk, hosi taxa insidénsia, bainhira haree didi’ak ba dadus kazu pozitivu ne’ebé iha, Timor-Leste atinji 1.000 kazu iha loron 384 nia laran, maibé iha loron 17 nia laran deit, hosi 1.000 sa’e ba 2.000 kazu, hafoin iha loron 11 nia laran de’it, hosi 2.000 sa’e ba 3.000 kazu, no ikus liu, iha de’it loron neen nia laran, sa’e hosi 3.000 ba 4.000 kazu.

Informa mós ba públiku katak, profisionál saúde-sira ne’ebé serbisu iha Hospitál Referénsia Maliana, hamutuk hotu 130, iha loron tolu ikus, na’in 11 mak detetadu pozitivu (8,4%). Rastreiu sei kontinua halo nafatin iha hospitál ne’e. Ohin, serbisu konsulta esterna suspende temporariamente atendimentu, maibé serbisu emerjénsia, maternidade no internamentu seluk, kontinua funsiona, maski iha médiku no enfermeiru lubuk ida mak tenki tama kuarentena, tanba kontaku-besik ho sira ne’ebé pozitivu.

Informasaun hosi izolamentu

Iha 20 maiu 2021, izolamentu Vera Cruz halo tratamentu ba kazu detetadu na’in 36, iha área obstetrisia na’in 13 no iha medisina interna na’in 22,  pediatria ida,  iha obstetrisia na’in 13 kategoria leve ka mild hotu.

Iha área medisina interna na’in 22.  Na’in-haat grave, ne’ebé na’in-rua iha ICU uza ventiladór no na’in-rua uza oxijéniu na’in 19 moderadu. Kazu ida iha pediatria tama iha kategoria leve ka mild.

Númeru kazu moderadu no grave ne’ebé baixa iha Vera Cruz, hatudu  katak, bainhira ema barak liu detetadu pozitivu, barak-liu tan maka sei baixa ho kategoria moderadu no grave.

Apelu

Apela ba populasaun iha Timor-Leste laran tomak atu tu’ur hakmatek, kumpri ho rigór regra serka  sanitária  no konfinamentu  domisiliáriu  ne’ebé  Konsellu  Ministru  deside no implementa ona.

Husu atu hotu-hotu kolabora ho autoridade saúde hodi  bele  buka-tuir  ema  hotu-hotu ne’ebé hetan da’et ona virus ne’e, no izola hosi no labele hada’et-tutan ba ema ne’ebé seidauk hetan da’et.

Ba populasaun tomak, favór respeita nafatin regra prevensaun no ijiéne individuál ne’ebé Governu hatuur ona atu prevene moras COVID-19 da’et ba mai.

Regra sira-ne’e mak hanesan, uza máskara, fase liman bebeik ho sabaun ka uza dezinfetante ruma, evita kose liman ba matan, inus ho ibun, bainhira kumprimenta-malu la presiza kaer-liman, bensa-liman, rei-malu ka hakuak-malu, evita halibur-malu barak, hamriik ka tuur dook hosi ema seluk mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here