Prezidente Repúblika, Francisco Guterres ‘Lú Olo’. Imajen TATOLI/Egas Cristóvão

DILI, 20 maiu 2021 (TATOLI)—Iha kada selebrasaun loron nasionál sira, tuir tradisaun Prezidente Repúblika ho nia poder konstitusionál sira fó indultu no komutasaun pena ba prizioneriu sira bazea ba proposta indultu hosi Governu.

Prezidente Repúblika, Francisco Guterres Lú Olo, hateten Prezidente Repúblika simu pedidu indultu hosi Governu hamutuk 61, maibé prosesu barak inkompletu ka la kumpre rekizitu obrigatóriu hosi Lei 5/2016 kona-ba konsesaun indultu no komutasaun pena liuliu haree ba Konstituisaun RDTL artigu 85, mak PR fó de’it indultu ba prizioneiru na’in-neen (6) no fó indultu parsiál na’in-sia (9) ho total hamutuk na’in-15.

Notísia Relevante: Prezidente Repúblika fó indultu ba prizioneiru na’in-15

“Iha loron ita selebra restaurasaun Independénsia, ha’u bele fó de’it indultu ba prizioneiru na’in-neen (6). Ohin duni, odomatan kadeia nian loke ba prizioneiru indultadu sira-ne’e. Ita hein katak sira sei integra fila-fali iha sira-nia família no sosiedade, no hotu-hotu sei simu ho di’ak. Ho prosesu sira seluk, ha’u bele fó de’it indultu parsiál ba prizioneiru na’in-sia (9),” Prezidente Repúblika hato’o mensajen Estadu nian liuhosi selebrasaun loron restaurasaun independénsia ba dala-XIX, iha Palásiu Prezidensiál Nicolau Lobato, Bairru Pite, Dili, kinta ne’e.

Xefe Estadu ne’e hatutan, maske Prezidente Repúblika hakarak fó tan indultu ba prizioneiru sira seluk labele tanba tenke kumpre rekizitu sira lei-nian.

Tanba ne’e, iha tinan rua ba kotuk Prezidente Repúblika fó hanoin ona ba Parlamentu Nasionál atu hadi’ak Lei númeru 5/2016 hodi fó dalan ba Prezidente Repúblika atu kumpre nia knaar loloos tuir Konstituisaun RDTL artigu 85 haruka.

Iha konstituisaun RDTL, artigu 85 (Kompeténsia Rasik), Prezidente Repúblika de’it mak sei hala’o knaar hirak ne’e:

a.) Promulga diploma legislativu no haruka públika rezolusaun hosi Parlamentu Nasionál ne’ebé aprova akordu no ratifika tratadu konvensaun internasionál sira;

b.) Hala’o kompeténsia kona-ba knaar Komandante Supremu Forsa Armada nian;

c.) Hala’o direitu veto kona-ba diploma lejislativu nian, iha prazu loron 30 nia laran hahú hosi loron simu nian;

d.) Foti no fó pose ba Primeiru-Ministru ne’ebé partidu eh aliansa partidu sira ho maiória parlamentár sei foti, bainhira rona partidu polítiku sira-ne’ebé iha Parlamentu Nasionál;

e.) Husu Tribunál Supremu Justisa nian kona-ba apresiasaun preventiva no ba fiskalizasaun abstratu konstitusionalidade norma sira-nian, no mós haree inkonstitusionalidade tan omisaun;

f.) Hato’o ba referendu problema boot interese nasionál nian, tuir termu sira iha Artigu 66;

g.) Deklara estadu serku nian ka estadu emerjénsia, tuir Parlamentu Nasionál haruka, bainhira rona tiha ona Konsellu-Estadu, Governu no Konsellu Superiór Defeza no Seguransa nian;

h.) Deklara funu ka halo dame, tuir proposta Governu nian, bainhira rona tiha ona Konsellu-Estadu, Governu no Konsellu Superiór Defeza no Seguransa nian, tuir Parlamentu Nasionál haruka;

i.) Rona tuir Governu, atu fó perdaun ka hamenus kastigu;

j.) Konfere, tuir lei, títulu onorífiku, kondekorasaun no mós distinsaun.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here