Foos hosi Governu sentrál hatún iha armazen MSSI Covalima. Imajen/MSSI

DILI, 20 maiu 2021 (TATOLI)–Prezidente Sentru Lojíztika Nasionál (CLN sigla portugés), Augusto Junior Trindade, hateten, armazen nasionál halo ona intervensaun merkadu ho foos tonelada 8.400.

“Ita agora hasai ona hosi armazen hamutuk foos tonelada 8.400 ka saka 340 hodi halo intervensaun merkadu iha territóriu laran,” Prezidente CLN informa ba Agência TATOLI, via telefónika, kinta ne’e.

Nia dehan, daudaun parte CLN nota katak foos iha merkadu ninia presu normál hela, maibé halo intervesaun iha munisípiu balun ne’ebé preokupa ho folin foos sa’e.

Notísia relevante: Stock foos tonelada 18.400, CLN disponível ajuda umanitária tuir pedidu

“Agora sira ladún preokupa ho folin sa’e tanba agora normál ona iha fatin lubuk iha munisípiu sira,” nia akresenta.

Maski nune’e, CLN sei kontinua halo intervesaun bainhira iha fatin balun iha preokupasaun folin foos sa’e.

“Ami sei kontinua halo intervensaun merkadu bainhira ami simu pedidu ka reklamasaun hosi ita-nia konsumidór iha munisípiu sira, tantu iha Dili. Ami-nia presu normál $10,50, tanba ne’e husu ba públiku kontinua kalma,” nia apela.

Antes ne’e, relasiona ho serka sanitária, Ministru Koordenadór Asuntu Ekonómiku, Joaquim Amaral, hasai diploma ministeriál urjente, hodi fó prioridade ba munisípiu Covalima no Bobonaro inklui Rejiaun Administrativa Espesiál Oé-cusse Ambeno (RAEOA) hodi halo intervensaun merkadu.

CLN rasik nota katak rejiaun-tolu ne’ebé aplika serka sanitária, daudaun folin foos sa’e  $17 to’o $18, enkuantu presu normál hosi $12 to’o $14.

Totál foos ne’ebé maka parte CLN hasai hodi halo intervensaun merkadu ba munisípiu Bobonaro hamutuk tonelada 1.000, Covalima tonelada 1.000 no RAEOA tonelada 3.000.

Nune’e mós, CLN halo ona intervensaun umanitária dahuluk, ho koordenasaun hosi Ministériu Solidaridade Sosiál no Inkluzaun (MSSI), konsege transporta foos saka 400 ba abitante aldeia tolu hanesan Klauhalek, Fatumean, no Mane-ki’ik iha postu administrativu Fatumean, munisípiu Covalima, nune’e mós halo distribuisaun ba zona izoladu iha munisípiu Bobonaro no RAEOA.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here