Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo. Imajen TATOLI/António Gonçalves.

DILI, 19 maiu 2021 (TATOLI)—Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, husu povu hamutuk hakat liu difikuldade ne’ebé hasoru hanesan dezastre naturál foin lalais no COVID-19.

Governante ne’e ko’alia lia hirak ne’e iha ámbitu restaurasaun Independénsia Timor-Leste ba da-19.

“Parabéns ba povu doben Timor-Leste, ho espíritu Restaurasaun Independénsia nian, mai ita hamutuk tau forsa hodi bele hakat Iiu difikuldade sira ne’ebé nasaun hasoru daudaun ne’e,” Ministru Francisco Martins hato’o mensajen ne’e ba Agência TATOLI, iha ninia knaar fatin, Palásiu Governu, kinta ne’e.

Notísia relevante: Governu fó flesibilidade sidadaun asesu apoiu sosiu-ekonómiku iha ámbitu konfinamentu

Nia rekoñese, tinan ne’e la hanesan tinan antes tanba nasaun iha situasaun kalamidade no atividade ekonomia barak mak paradu halo ema barak lakon serbisu no empreza barak tenke taka, tanba ne’e presiza serbisu hamutuk hodi bele liu situasaun difísil ne’e.

“Ho problema sira ne’ebé maka ita-nia nasaun hasoru, ita-nia Estadu no Governu foti ona medida imediata hodi fó resposta ba estabilizasaun ekonomia, proteje saúde povu nian no konstrui filafali ita-nia infraestrutura sira,” nia akresenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here