Reuniaun Konsellu Ministru, iha salaun Ministériu Finansa, Aitarak-laran, kuarta (19/05). Imajen TATOLI/Egas Cristóvão

DILI, 19 maiu 2021 (TATOLI)—Reuniaun Konsellu Ministru (KM) iha kuarta ne’e, aprova ona Projetu Dekretu-Lei, kona-ba insentivu estraordináriu ba suku sira, ne’ebé aprezenta hosi Ministru Administrasaun Estatál (MAE), Miguel Pereira de Carvalho.

“Kompesasaun finanseiru estraordináriu ne’e atu atribui ba suku sira tanba haree ba akrésimu esesionál serbisu, ne’ebé halo tiha ona no sei realiza iha fulan oinmai,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu iha salaun Ministériu Finansa (MF), Aitarak-laran.

Governu iha rekoñesimentu nesesidade no importánsia serbisu ne’ebé hala’o ona hosi suku sira ba interese no benefísiu hosi Estadu iha kontestu situasaun pandemia no dezastre naturál.

Insentiva ne’e tanba Governu rekoñese papel xefe suku sira no xefe aldeia iha traballu preparatóriu to’o ezekusaun programa Governu iha ámbitu kalamidade.

Seidauk hatene montante ba kada pesoál, maibé antes ne’e, iha tinan 2020, Governu fó subsídiu estraordináriu ne’ebé selu dala ida de’it no sei transfere ba konta bankária suku nian, ne’ebé kada xefe suku simu $200, xefe aldeia $100 no pesoál apoiu ba administrasaun suku sei simu mós $100.

Valór kompensasaun ba kolaboradór apoiu ba programa Governu iha suku sira sei define liuhosi diploma ministeriál hosi MAE.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here