Ministra Negósiu Estranjeiru no Kooperasaun, Adaljiza Albertina Xavier Reis Magno, no Embaixadór Austrália iha Timor-Leste, Peter Roberts, asina akordu, iha sala VVIP Aeroportu Comoro, Dili, kuarta (19/05). Imajen/Natalino Costa

DILI, 19 maiu 2021 (TATOLI)—Governu Timor-Leste, reprezenta hosi Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, no Governu Austrália reprezenta hosi Embaixadór Peter Roberts, ofisialmente asina akordu servisu aéreu (Air service Agreement).  

“Akordu ne’e kria regra ba aviaun atu bá-mai entre Timor-Leste no Austrália,” Embaixadór Austrália iha Timor-Leste, Peter Roberts, hateten iha Aeroportu Internasionál Prezidente Nicolau Lobato, Comoro, Dili, kuarta ohin.

Aleinde ne’e, akordu ne’e  fó direitu ba kampañia aviaun atu halo movimentu hosi nasaun rua ne.

“Sei kria ambiente boot iha ligasaun aérea tanba iha ona regra, tanba ne’e fasil halo ligasaun entre nasaun rua no nasaun seluk,” nia akresenta.

Diplomata ne’e dehan, akordu ne’e fasilita mós Aviaun Qantas mai Dili kada semana rua dala ida hodi tula kargu.

“Ha’u espera semana oin aviaun rua ka tolu sei mai atu lori apoia umanitária no medikamentu hosi Austrália,” nia hatutan.

Iha fatin hanesan, Ministra Adaljiza Albertina, sente onradu reprezenta Governu Timor-Leste bele asina akordu ne’e.

“Ondra boot ba ha’u tanba asina karta nota diplomátiku ohin loron atu estabelese Air Service Agreement entre nasaun rua,” nia dehan.

Tuir governante ne’e, akordu ne’e marka tan pasu ida ne’ebé signifikativu tebes ba istória Timor-Leste no Austrália, ne’ebé halo esforsu toomak iha área konetividade.

“Fiar katak konetividade ne’e sei sai buat ne’ebé potetensiál tebes atu partilla oportunidade ba dezenvolvimentu promosaun komérsiu no kooperasaun iha aspeitu barak,” nia subliña.

Antes ne’e, nasaun rua ratifika ona akordu aéreu atu fasilita konetividade no loke dalan ba kompañia aérea atubele sirkula.

Ratifikasaun akordu servisu aéreu ne’e sei loke dalan ba aviaun australiana bele sirkula komersiálmente iha Timor-Leste hodi asegura konetividade via aéreu entre nasaun rua.

Nune’e, proposta rezolusaun ne’e bazeia ba nasaun rua nia hakarak atu promove sistema aviasaun internasionál ne’ebé iha konkorrénsia entre empreza transporte aéreu sira iha merkadu, ho servisu sira ne’ebé kompetitivu, inovadór no seguru.

Nune’e mós, kompañia aérea sira sei bele tama iha espasu aéreu nasaun rua nia, ne’ebé la presiza autorizasaun prévia maibé kumpre de’it rekizitu regulamentár inklui seguransa hodi permite hasa’e konkorrénsia no hamenus folin billete no transporte merkadoria.

Austrália iha baze legál ida atu designa aviaun ruma hanesan Qantas no Virgin mai iha Timor-Leste atubele asegura konetividade aéreu.

Daudaun Airnorth mak asegura konetividade entre Timor-Leste no Austrália maibé to’o de’it iha Darwin, ho tipu viajen charter.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here