Plenaria Parlamentu Nasional. Imajen Tatoli Antonio Goncalves.

DILI, 14 maiu 2021 (TATOLI)—Parlamentu Nasionál lideradu Deputadu Aniceto Longuinhos Guterres Lopes, deside kritéria ba deputadu sira-ne’ebé atu halo fiskalizasaun polítika iha aplikasaun serka sanitária no konfinamentu obrigatória tanba propagasaun surtu COVID-19.

Sekretária Meza Parlamentu Nasionál, Deputada Lídia Norberta dos Santos, fó-sai katak iha reuniaun líder bankada parlamentár ba loron ohin ko’alia kona-ba oinsá atu realiza atividade fiskalizasaun durante konfinamentu domisiliária no serka sanitária iha munisípiu Dili no mós munisípiu sira seluk.

“Deputadu sira-ne’ebé atu ba halo fiskalizasaun obrigatória tenke teste swab no vasina. Bainhira deputadu sira la vasina ho teste swab, entaun nia kria hela risku ba ema seluk. Kritéria sira-ne’e mak deputadu sira tenke haree, bainhira ba halo fiskalizasaun,” Deputada Lídia Norberta dos Santos informa liuhosi konferénsia imprensa, iha uma fukun, sesta ne’e.

Iha konferénsia líder bankada parlamentár ne’e, Prezidente Parlamentu Nasionál hanoin katak, órgaun soberania sira tenke kontinua serbisu inklui atividade fiskalizasaun tenke kontinua.

Maibé ba atividade fiskalizasaun atu realiza iha kritéria barak ne’ebé mak tenke haree, liuliu Komisaun Espesializada Permanente (KEP) sira tenke identifika programa sira-ne’ebé urjente mak bele halo fiskalizasaun.

Portavós Parlamentu Nasionál ne’e hateten, molok ba halo atividade fiskalizasaun deputadu sira labele ba hotu, pelumenus deputadu na’in-tolu mak bele arranka.

Deputada Lídia fó ezemplu, komisaun ida iha detadu na’in-sia (9), komisaun balun iha deputadu na’in-11 no na’in-13 hanesan komisaun C, ne’e signifika deputadu na’in-13 ne’e labele ba hotu.

Nune’e Prezidente Parlamentu Nasionál rekomenda atu komisaun sira kria sub-grupu nune’e membru deputadu hosi komisaun labele la’o dala-ida.

Maske nune’e, Deputada Lídia Martins, fó-sai katak asuntu ne’e sei lori ba plenária hodi halo debate no posibilidade sei aprova projetu-rezolusaun regula deputadu sira-nia atividade fiskalizasaun polítika ne’e.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here