Labarik mane ida lori has budu hodi fa’an iha área Colmera, sesta, 27 novembru 2020. Imajen TATOLI/António Gonçalves

DILI, 14 maiu 2021 (TATOLI)—Komisaun Nasionál Kontra Traballu Infantil (CNTI, sigla portugés) realiza konferénsia imprensa hodi afirma pozisaun iha ámbitu loron mundiál kontra traballu infantil ne’ebé kada tinan sempre selebra iha loron 12 maiu.

“Iha loron ida-ne’e, ami hanesan Komisaun Nasionál Kontra Traballu Infantil husu ba Governu no parseiru sira atu serbisu hamutuk elemina traballu infantil iha ita-nia rai laran,” Prezidente CNTI, Aniceto Leto Soro, hateten iha edifísiu Inspesaun Jerál Traballu (IGT, sigla portugés) iha Hudi-laran, sesta ne’e.

CNTI halo konferénsia imprensa iha salaun IGT, Hudi laran, sesta (14/05). Imajen/Natalino Costa

Nia dehan, bazeia ba peskiza ne’ebé komisaun halo hamutuk ho Organizasaun Internasionál Traballu (OIT) iha tinan 2016, hatudu katak labarik 12% iha Timor-Leste maka halo atividade traballu infantil.

“Tuir rezultadu peskiza, hatudu ita-nia alin sira iha Timór laran tomak hamutuk 442.000. Entre labarik sira ne’e, iha pur volta 16% maka halo serbisu no hosi persentajen ne’e, iha 12% maka konsidera hanesan traballu infantil,” nia esplika.

Peskiza ne’e mós hatudu katak razaun labarik sira partisipa iha traballu infantil tanba situasaun ekonomia, família kiak no jeografia.

“Labarik barak maka hela iha fatin dook hosi eskola no tanba kondisaun estrada, entaun labarik sira prefere liu hela iha uma do que la’o ho distánsia dook atu ba eskola no balun hakarak duni ajuda famiíia hodi buka osan sustenta família,” nia esklarese.

Entretantu, iha tinan ne’e la selebra loron mundiál tamba  situasaun Estadu Emerjénsia no Serka Sanitária kauza hosi pandemia COVID-19.

Tema nasionál ba selebrasaun loron mundiál ba traballu infantil ba tinan ne’e maka ‘Laiha fatin ba traballu infantil iha sosiadade Timor-Leste no traballu infantil halakon labarik sira-nia futuru no halo mukit sosiadade’.

Nune’e mós, ‘Traballu infantil halerik labarik sira-nia dezenvolvimtu no traballu infantil lori impaktu negativu ba labarik feto sira atu alkansa igualdade’.

Iha tinan 2009, Timor-Leste ratifika ona konvensaun númeru 182 hosi OIT, kona-ba interditasaun forma pior traballu ba labarik sira no asaun imediata atu halo eliminasaun.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here