Serimónia entrega ambulánsia 38 hosi Embaixadór Japaun iha TL, Kinefuchi Masami, ba Ministra Saúde, Odete Maria Freitas Belo, iha Palásiu Sinzas, Caicoli, kuarta (12/05/21). Imajén/Média MS.

DILI, 12 maiu 2021 (TATOLI)—Governu Timor Leste (TL), liu hosi Ministra Saúde (MS), Odete Maria Freitas Belo, agradese ba Governu Japonéz, ne’ebé oferese ambulánsia hamutuk 38, no mós ekipamentu médiku atu tulun di’ak liu tan prevensaun surtu COVID-19 iha nasaun ne’e.

“Agradese ba Governu Japaun, tanba apoia ona ambulánsia 38, ida ba Sekretária Estadu Protesaun Sivíl no seluk sei distribui ba Sentru Saúde, iha munisípiu hotu-hotu,” Odete Maria Freitas Belo, agradese iha serimónia entrega ne’ebé hala’o iha Palásiu Sinzas, Caicoli, kuarta ne’e.

Notísia relevante:COVID-19: pozitivu 133, rekoperadu 129 no ativu 1.727

Governante ne’e konsidera apoiu ne’ebé iha, sei tulun di’ak liu tan Ministériu Saúde, hodi prevene COVID-19, ne’ebé númeru pozitivu kontinua aumenta kada loron.

Odete mós rekoñese katak, durante ne’e ekipa saúde enfrenta duni difikuldade, liuliu iha transporte atu halo transportasaun ba pasiente COVID-19.

Nune’e mós Embaixadór Japaun iha TL, Kinefuchi Masami, louva esforsu ne’ebé Governu no povu  TL halo ona, hodi kontra surtu ida-ne’e.

“Ha’u louva esforsu ne’ebé Governu no povu TL halo ona, hodi luta kontra surtu ida-ne’e. Agora daudaun tempu ba ita hotu hodi pasiénsia no kontinua esforsu hamutuk luta hasoru virus ida-ne’e,” Kinefuchi Masami, louva.

Diplomata japonéz ne’e iha esperansa katak, ho ambulánsia no ekipamentu médiku ne’ebé oferese sei ajuda salva ema hotu-hotu iha TL.

Ekipamentu saúde ho ambulánsia 38, ne’ebé Japaun oferese iha projetu ne’e, ho valór orsamentu millaun $4.6.

Ekipamentu médiku sei utiliza iha Ospitál Nasionál Guido Valadares (HNGV sígla portugés), izolamentu iha Vera Cruz, Ospitál referál lima hanesan Baucau, Maubisse, Maliana, Covalima no RAEOA nune’e mós ambulánsia-sira.

To’o ohin loron, Japaun oferese ona asisténsia oi-oin iha luta hasoru COVID-19 iha TL, no komprometidu hodi oferese tan asisténsia millaun $16-resin.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here