Vendedor sira uja maskra hodi prevene an COVID-19. Imajen Tatoli/António Gonçalves

LIQUIÇA, 12 maiu 2021 (TATOLI) –Serka sanitária no konfinamentu domisiliáriu obrigatóriu iha Dili lori taterus mós ba  negosiante-sira iha Munisípiu Liquiça. Basá  sira-nia produtu lokál ne’ebé sira fa’an iha merkadu la folin ona no susar tebes atu hetan rendimentu ka hetan osan.

Notísia Relevante : Serka sanitária, negosiante 80-resin iha Leorema difisil atu devolve osan kréditu

Ho rendimentu ne’ebé difisil tebes ne’e, negosiante-sira laran susar atu oinsá maka bele iha osan atu kumpre sira-nia obrigasaun devolve osan ne’ebé sira foti ka kréditu hosi institutu finanseiru-sira hanesan Kaebauk Investimentu no Finansas, Moris Rasik no Banku Nasionál Komérsiu Timor-Leste (BNCTL).

“Ami negosiante iha Merkadu Liquiça maioria moris ho kréditu iha banku, iha tinan kotuk, bainhira Governu hasai estadu emerjénsia ami sente sei di’ak uitoan, maibé serka sanitáriu no konfinamentu domisiliáriu iha Dili halo ami susar liu tan, tanba negosiante-sira hosi Dili la bele mai sosa ona ami nia produtu merkadoria nian iha Liquiça no ami mós la bele lori ona ai-fuan, modo no ikan ba fa’an iha Dili,” negosiante Leopoldo Maria Soares, hateten ba Agência Tatoli iha Merkadu Liquiça, kuarta ne’e.

Notísia Relevante : Peskadór-sira ho negosiante modo iha Liquiça menus rendimentu

Nia husu ba Governu liu-liu Ministru Finansas atu foti medida suspende provizóriu banku sira labele sisi sira to’o serka sanitária remata mak foin bele selu fali.

Iha fatin hanesan Carlota da Silva hanesan mós negosiante ne’ebé foti kréditu iha BNCTL hateten, sente triste tanba durante fulan rua ona nia rendimentu laiha.

“Bele haree rasik ba ami nia modo no ai-fuan sira ne’ebé ami fa’an dodok hotu, ami kréditu osan mak sosa, ha’u kréditu iha BNCTL, maibé kada fulan tenke selu agora loron ida ami hetan $1.00 ka $2.00 de’it, ami atu halo saida, ami la husu buat barak, ami husu ba Governu atu hapara lai banku sira labele sisi ami iha situasaun serka sanitária ne’e,” Carlota da Silva.

Notísia Relevante : Modo-tahan ho ai-fuan dodok iha merkadu

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here