Primeiru-Ministru, Taur Matan Ruak, prezide reuniaun Konsellu Ministru, iha salaun Ministériu Finansa, Aitarak-laran, kuarta (12/05). Imajen TATOLI/Egas Cristóvão

DILI, 12 maiu 2021 (TATOLI)—Iha ámbitu reuniaun Konsellu Ministru (KM), aprova Projetu Dekretu-Lei, ne’ebé aprezenta hosi Vise-Primeiru-Ministru no Ministru Planu no  Ordenamentu, José Maria dos Reis, kona-ba rejime jurídiku klasifikasaun no kualifikasaun solu.

“Diploma ne’e hakarak estabelese parámetru sira hodi klasifika no kualifika solu sira ne’ebé aplika ba prosedimentu elaborasaun, alterasaun no revizaun planu territoriál iha ámbitu munisipál, ho rejime uzu solu ne’ebé define iha Lei Baze Ordenamentu Territóriu nian,” Ministru Prezidénsia Konsellu Ministru, Fidelis Manuel Leite, informa hafoin ramata reuniaun ezekutivu, iha salaun auditóriu Ministériu Finansa (MF), Aitarak-laran, kuarta ne’e.

Tuir Portavóz Governu, solu sira klasifika enkuantu urbanu sira lori opsaun planeamentu ida hosi distinsaun fundamentál, ho ninia natureza, funsaun, potensialidade no destinu báziku.

Antes ne’e, Ministériu Obra Públika (MOP) inisia ona Dekretu-Lei tolu ne’ebé entrega ona ba Ministériu Planu no Ordenamentu (MPO), relasiona ho Planu Urbanu hanesan Lei Jestaun Territoriál, Klasifikasaun Uzu Solu no Urbanizasaun inklui Edifikasaun Urbanu no fahe ona ba kada ministériu hodi analiza tanba lejizlasaun ne’e envolve servisu liña ministériu.

Bainhira lei tolu ne’e aprova, parte kompetente bele halo planeamentu urbanu no mós regulamentu hodi kontrola ema hela dook iha estrada inklui bele organiza sidade.

Nune’e mós, regula kreximentu ambiente fíziku ne’ebé sidadaun sira instala iha sidade inklui halo jestaun movimentu transporte no tráfiku, ne’ebé tuir servisu liña ministériu kabe ba kapasidade Ministériu Transporte no Komunikasaun (MTK), ho vizaun presiza melloramentu rede estrada no ponte atu fasilita movimentu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here