Grupo estudante Isar Bandeira uainhira tama iha formatura. .Imajen/Antonio Goncalves

DILI, 12 maiu 2021 (TATOLI)—Governu liuhosi Ministériu Administrasaun Estatál (MAE), sei selebra loron restaurasaun Independénsia Repúblika Demokrátika Timor-Leste (RDTL) ba dala-19 iha 20 maiu ho tema “A União a Luta Conjunta para Victoria de Todos” ka “Ita-nia Unidade no Luta Hamutuk para Vitória Ita Hotu Nian”.

Ministru Administrasaun Estatál, Miguel Perreira de Carvalho, hateten Governu deside hili tema ida-ne’e, tanba agora daudaun Timor-Leste enfrenta ka atravessa hela situasaun COVID-19 no kalamidade públiku ne’ebé ema hotu presiza luta hamutuk atu kombate.

Ministru Administrasaun Estatal (MAE), Miguel Pereira de Carvalho . Imajen/Media MAE.

“Ohin, ha’u informa planu Governu nian ba Prezidente Repúblika Francisco Guterres Lú Olo kona-ba selebrasaun restaurasaun Independénsia Repúblika Demokrátika Timor-Leste ba dala-19 ne’ebé sei monu iha kinta (20/05) semana. Maske Timor-Leste enfernta pandemia COVID-19 no kalamidde públiku maibé Governu nafatin selebra loron importante ne’e,” Miguel Perreira de Carvalho hateten ba jornalista sira hafoin enkontru ho Prezidente Repúblika, iha rezidénsia PR, Faról, Dili, kuarta ne’e.

Situasaun rua ne’ebé Timor-Leste enfrenta ne’e ejize Timor-oan hotu hamutuk no luta hamutuk para manan inimigu, tanba inimigu agora ne’e diferensa ho inimigu ida-ne’ebé ita manan iha 1999 ne’e tanba inimigu agora ne’ebé labele haree hetan (COVID-19).

Nia informa, Governu liuhosi komisaun organizadora halo ona preparasaun ba atividade simples no sei la involve ema barak iha selebrasaun restaurasaun independénsia Timor-Leste nian ba tinan ida-ne’e.

“Ita la halo selebrasaun boot maibé ita tenke fó sinál ruma ba loron 20 maiu mak hahú ho misa agradesimentu. Misa agradesimentu bele halo forma rua, anúnsia ona ba Dioseze Dili katak kazu iha Dili sei nafatin konfinamentu domisiliáriu mak misa ne’e ita hala’o ho transmisaun direta de’it liuhosi Rádiu Televizaun Timor-leste (RTTL), Televizaun GMN no televizaun sira seluk, atu sarani sira hotu bele akompaña misa liuhosi virtual,” nia dehan.

Nune’e mós, serimónia 20 maiu sei hahú ho hasa’e bandeira iha Palásiu Prezidensiál no serimónia ne’e sei prezide hosi Prezidente Repúblika Francisco Guterres Lú Olo, no sei partisipa hosi konvidadu sira ne’ebé limitadu no sei iha distansiamentu sosiál tuir regra Estadu Emerjénsia nia para evita ema barak.

Iha parte lorokraik, nia dehan, sei iha mós serimónia hatún bandeira no komisaun organizadora sei koordena ho Parlamentu Nasionál para Prezidente Parlamentu Nasionál mak sei prezide hatún bandeira.

Tuir nia, traballu konjuntu entre komisaun organizadora no estudante sira, FALINTIL-Forsa Defeza Timor-Leste no Polísia Nasionál Timor-Leste (F-FDTL-PNTL) para atu kompoin ekipa korpu dada bandeira nian.

“Corpo de içar bandeira hamutuk 65 ne’ebé Governu mobiliza ona maihosi munisípiu hotu-hotu inklui mós Rejiaun Administrativa Espesiál Oé-Cusse Ambeno (RAEOA) para atu bele kompoin korpu dada bandeira nian, no iha mos forsa F-FDTL balun hola parte iha dada bandeira ne’e,” nia dehan.

Kona-ba osan ba komemorasaun 20 maiu ne’e, nia hateten, eskalaun ne’e kiik demais tanba nia despeza ne’e la hanesan babain ne’ebé mak boot, nune’e komisaun organizadora sei planea orsamentu balun.

“Hau labele temi nia montante balun iha-ne’e, maibé Governu fó kuaze rihun $100 para bele organiza serimónia. Tanba despeza ne’e kobre kona-ba treinamanetu ba membru corpo içar bandeira, ne’ebé loron tolu haat ona hahú tama iha fatin treinamentu, no mós despeza relasionadu ensaiu sira,” nia hateten.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here