Kondisaun uma komunidade iha aldeia Moris Foun, Tasi-tolu kauza hosi inundasaun iha 04 abríl. Imajen Tatoli/Eugénio Pereira.

DILI, 11 maiu 2021 (TATOLI)—Sekretária Estadu Protesaun Sivíl (SEPS), hato’o ona pedidu ba Ministériu Finansa (MF), liu hosi fundu kontijénsia hamutuk millaun $12, atu bele halo akizasaun ba nesesidade bázika, apoiu umanitáriu ba vítima dezastre natural iha territóriu.

SEPS, Joaquim Gusmão, hateten presiza tan orsamentu ne’e atu bele halo akizasaun ba sasán nesesidade bázika hanesan ai-hán no la’ós ai-hán, hodi responde ba vítima afetadu, tanba daudaun-ne’e estok  menus ona.

Notísia relevante:SEPS kontinua buka mate-isin na’in-sia

“Ita-nia pedidu ba MF ba apoiu umanitáriu ho atividade operasionál, besik miliaun $12,’’ Joaquim Gusmão, hateten ba jornalista Agéncia Tatoli, iha nia kna’ar fatin Caicoli, segunda ne’e.

Pedidu ne’e, iha ona prosesu atu bele hetan apoiu alokasaun fundu kontijénsia, nune’e  bele suporta liu-tan sasán apoiu umanitáriu.

Kona-bá kuantidade estok sasán ne’ebé sei iha,  Governante ne’e la esplika detalla, maibé nia dehan menus ona no sei la to’o atu distribui tuir númeru família ne’ebé rejistadu.

Tuir dadus hosi Ministéiru Administrasaun Estatál (MAE) ho SEPS rejista família afetadu dezastre naturál hamutuk 33.177 iha territóriu Timor-Leste (TL).

Hosi númeru ne’e família  besik 90% mak hosi Dili no 10%  hosi Munisípiu no resposta ne’ebé Governu hala’o mak fó ona apoiu emerjénsia hanesan ai-hán no la’ós ai-hán ba família 50% hosi totál família 33.177.

Ekipa ne’ebé lidera hosi MAE hamutuk ho protesaun sivíl no parseiru halo ona levantamentu dadus ba estragu, nune’e bele fó apoiu rekoperasaun hodi konstrui fila-fali.

Iha rezultadu levantamentu identifika uma 25.000 mak afetadu, iha uma 24.000 aat kamán, aat natón 553 ho aat totál 554.

Entretantu, iha Orsamentu Retifikativu (OR) liu hosi alterasaun Lei Orsamentu Jerál Estadu (OJE) 2021, foti hosi fundu infraestrutura millaun $54 no ministéiru-sira hamutuk milliaun $65, nune’e rezerva kontijénsia sa’e ona ba millaun $100-resin, hodi fó resposta ba problema inundasaun ne’ebé akontese iha 04 abríl.

Prezidente Repúblika (PR), Francisco Guterres ‘Lú-Olo’ iha 03 maiu promulga ona Orsamentu Retifikativu, nune’e Governu bele implementa.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here