Empreza Montana Diak mobiliza ekipamentu pezadu iha estrada Embaixada Japaun oin, iha estrada protokolu iha Praia dos Coqueiros, kuarta (05/05). Imajen TATOLI/Egas Cristóvão

DILI, 10 maiu 2021 (TATOLI)-Progresu rekonstrusaun emerjénsia estrada protokolu ne’ebé kotu iha Embaixada Japaun oin, iha Praia dos Coqueiros, kauza hosi dezastre naturál foin lalais, atinje ona 80%.

“Ita-nia empreza Montana Diak halo rekonstrusaun estrada protokolu ne’e ho emerjénsia atinje ona 80% no bele dehan semana ida tan bele finaliza ona,” Ministru Obra Públika, Salvador Eugênio Soares dos Reis Pires, informa iha salaun Hotel Novo Turismo, Lecidere, Dili, segunda ne’e.

Ministru dehan, ekipa téknika sira relata rekuperasaun ne’e iha ona faze aterru sub-base course no kompaktasaun hodi kontinua fui alkatraun.

Hafoin faze ne’e, empreza kontinua serbisu aterru riprap (protesaun) hodi proteje tasi-been tama ba moru retensaun, hafoin prepara mós ba faze fui alkatraun.

Nune’e mós, sei halo instalasaun ba tubu 2inch no 5inch hodi kria sirkulasaun bee ne’ebé konsentra iha estrutura estrada nia okos hodi sai di’ak no sei a prejudika estrada nia estrutura.

Rekonstrusaun estrada ne’e hahú iha loron 20 abríl 2021 hafoin hetan desizaun hosi Konsellu Administrasaun Fundu Infraestrutura (KAFI) no realizasaun kontratu ho empreza hodi ezekuta ho emerjénsia .

Projetu rekuperasaun ho durasaun fulan ida, ne’ebé sei ramata iha fulan ne’e ho kustu obra hamutuk $134.000.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here