Vise-Ministru Administrasaun Estatál (V-MAE), Lino de Jesus Torrezão entrega karta ba Diretora Sekretariadu Tékniku PNDS, Claudina Soares Pinto. Imajén TATOLI/Osória Marques.

DILI, 10 maiu 2021 (TATOLI)—Governu liuhosi Ministériu Administrasaun (MAE), ohin entrega karreta operasionál 16 ba Diretór Delegasaun Programa Nasionál Dezenvolvimentu Suku (DD-PNDS) munisípiu 12 inklui Rejiaun Administrativa Espesiál Oé-Cusse Ambeno (RAEOA).

“Hosi karreta 16 ne’e kada munisípiu ida hetan karreta ida no karreta tolu seluk ba halo operasaun téknika ba territóriu nasionál. Tuir loloos karreta tolu sedauk to’o tanba karreta tolu halo operasaun ba munisípiu 12 inklui RAEOA. Governu entrega veikulu ba Diretór Delegasaun Programa Nasionál Dezenvolvimentu Suku (DD-PNDS) ne’e atu fasilita atividade PNDS nian iha suku,” Vise-Ministru Administrasaun Estatál, Lino de Jesus Torrezão, hateten ba jornalista sira, iha salaun VIP MAE, Colmera, Dili, segunda ne’e.

Membru Governu ne’e hatutan, bainhira Governu iha programa no planu ida mak laiha fasilidade entaun sei la atinje objetivu, nune’e ho karreta 16 ne’e atu hala’o duni programa PNDS nian ne’ebé tún to’o suku laran hodi hakbiit suku sira-ne’e nia abitasaun ida dignu mak Uma Kbiit Laek (UKL) no sede suku sira iha baze.

Tanba ne’e, tuir nia, Governu tenke oferese fasilidade liuliu karreta operasionál ne’ebé di’ak para autoridade komunitária sira bele uza ho di’ak no susesu.

“Ohin, ita entrega simbolikamente ba munisípiu haat mak Munisípiu Aileu, Dili, Ermera no Munisípiu Liquiça. Munisípiu seluk labele marka prezensa tanba serka sanitaria, entaun hafoin ne’e sira bele mai foti,” nia hateten.

Ho karreta Estadu ne’e, Vise Ministru apela ba DD-PNDS munisípiu sira atu utiliza karreta ne’e atu suporta programa ne’ebé Governu trasa ona hodi labele uza karreta ne’e hanesan privadu, tanba karreta ne’e la’ós ba diretór maibé atu fasilita atividade no halo operasaun iha suku laran.

Entretantu, Diretora Sekretariadu Tékniku Programa Nasionál Dezenvolvimentu Suku (PNDS), Claudina Soares Pinto, infroma katak kada unidade karreta ne’e kuaze ho folin $37.290.

Ho fasilidade ne’ebé MAE liuhosi PNDS suporta karreta operasionál ne’e, DD-PNDS Munisípiu Liquiça, Fernando Gonçalves, hato’o agradesimentu ba Governu liuliu Ministériu Administrasaun Estatál (MAE) tanba oferese ona karreta operasionál ba sira hodi tulun sira halao Serbisu iha terrenu.

“Dahuluk, ami-nia agradesementu wain ba MAE tanba halo esforsu hodi suporta karreta operasionál ne’e ba ami hodi hala’o atividade PNDS nian iha nivél munisipál sira no karreta ne’e destinadu ba administrasaun munisipál nian,” nia agardese.

Antes fahe karreta hirak ne’e ba DD-PND sira, ba dahuluk, Pe. Lourenço Soares, SBB, Comoro fó uluk bensaun ba karreta hirak ne’e, atu nune’e karreta ne’e bele hala’o atividade iha terrenu ho di’ak no susesu.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here