INFORDEPE.

DILI, 07 maiu 2021 (TATOLI) –  Vise-prezidente  Institutu Nasionál Formasaun ba Dosente-sira no  Profisionál Edukasaun (INFORDEPE, sigla portugés) na’in tolu, sesta ne’e, iha salaun Ian Martin, INFORDEOE, Dili, simu pose hosi Ministru Edukasaun Juventude no Desportu (MEJD), Armindo Maia.

Termu pose ne’e atu ejerse sira-nia servisu ba periodu tinan haat (2021-2025) hodi aselera prosesu iha formasaun akadémiku, formasaun kontinua no iha area peskiza.

Vise-prezidente INFORDEPE na’in tolu ne’ebé simu pose maka Manuel Pinto sei servisu iha area Formasaun Akadémiku, Anastácio Lemos Soares sei apoiu iha area Peskiza, no Rui da Costa Belo servisu iha area formasaun kontinua.

Ministru Armindo Maia, esplika katak baibain kuandu ema ida hetan fiar hodi asume kna’ar importante iha kualkér instituisaun tantu públiku ka privadu konsidera la’ós oportunidade, maibé responsabilidade.

 “Oportunidade ne’ebé imi simu tanba grasa Na’i Maromak nian  ne’ebé fó ona ba imi na’in-tolu atu sai hanesan vise-prezidente INFORDEPE hodi halo imi nia servisu ho responsabilidade. Tanba laiha oportunidade mós ha’u hanoin difisil ba imi atu hala’o servisu ida-ne’e,” Ministru Armindo Maia tenik.

Ministru Armindo esklarese katak responsabilidade ne’ebé vise na’in tolu foun sei hala’o iha periodu tinan haat ne’e oportunidade duni. Fiar katak hateten didi’ak area ne’ebé sira asume.

Prezidente INFORDEPE, Manuel Gomez de Araújo, afirma vise-prezidente na’in tolu ne’e presiza  maka kolaborasaun di’ak, atu nune’e, bele ezekuta programa sira ba tinan ida ne’e ho di’ak. Esperansa INFORDEPE nian konfinamentu obrigatóriu ne’e mak remata ona tantu iha nasionál no munisípiu, maka sei realiza planu sira ne’ebé trasa ona.

Vise-prezidente  INFORDEPE trata Asuntu Peskiza, Anastácio Lemos Soares afirma nia sei konvoka uluk enkontru dahuluk ho ninia funsionáriu-sira, depois maka nia sei kria planu servisu ida adekuadu  atu fahe tarefa servisu ba malu.

”Ha’u sei la ko’alia buat barak tanba foin mak asume kna’ar ne’e,  ha’u sei prepara ba segundu semestrál atu haree fali servisu ne’ebé seidauk halo atu aselera filafali,” nia tenik.

Biban ne’e, vise-prezidente INFORDEPE, Rui da Costa Belo trata asuntu Formasaun Kontinua konfesa katak nia iha ona planu atu aselera formasaun kontinua ba profesór-sira, atu nune’e, bele hadi’a nafatin kualidade profesór-sira nian iha futuru.

Jornalista       : Tomé Amado

Editór             : Francisco Simões

HAKEREK NO HATÁN

Please enter your comment!
Please enter your name here