Inaugurasaun postu PNTL-UPF iha área Wefauk, sesta (07/05). Imajen/GPM

DILI, 07 maiu 2021 (TATOLI)–Primeiru-Ministru (PM) no Ministru Interiór, Taur Matan Ruak, ofisialmente inaugura postu Polísia Nasionál Timor-Leste (PNTL), Unidade Patrullmentu Fronteira (UPF) iha área Wefauk, postu administrativu Balibo, munisípiu Bobonaro, ne’ebé baliza ho Indonézia.

Xefe Governu apresia tanba postu ne’e harii hosi kolaborasaun serbisu Governu Austrália no Timor-Leste.

“Orgullu boot bele partisipa iha serimónia ida-ne’e, hanesan fatin ne’ebé ita-nia Polísia Eskuadra ida sei mai hela iha fatin ida-ne’e hodi tau matan ba ita-nia fronteira terrestre,” PM Taur hateten iha seremónia inaugurasaun, ne’ebé haktuir iha nota imprensa ne’ebé Agência TATOLI asesu, sesta ne’e.

Tuir Xefe Ezekutivu, kooperasaun país rua ne’e iha aréa barak ona hanesan saúde, edukasaun, governasaun di’ak, agrikultura no área oin-oin inklui seguransa liuhosi Timor-Leste Police Development Programme, (TLPDP) ne’ebé halo parseria di’ak ho PNTL.

“Postu ida-ne’e halo kooperasaun ho Austrália, ho objetivu atu reforsa kontrolu fronteira hodi evita pasajen ilegál.

“Ha’u hakarak lori Governu no povu Timór nia naran, agradese ba Austrália liuhosi Embaixadór iha Timor-Leste,” PM dehan.

Nune’e, nia husu ba autoridade UPF atu uza postu ne’e ho kuidadu hodi halo serbisu asegura fronteira.

“Komandante UPF tenke uza ho kuidadu hanesan ita boot sira-nia uma hodi tau matan ba ita-nia komunidade, tanba ita-nia postu sira barak mak seidauk di’ak,” nia apela.

Postu UPF ne’e aumenta hodi kompleta postu UPF ne’ebé harii ona hamutuk 30-resin iha liña fronteira terrestre.

Seremónia ne’e, partisipa hosi Vise-Ministru Interiór, António Armindo, Embaixadór Austrália iha Timor-Leste, Peter Roberts, Espoza Primeiru-Ministru, Isabel da Costa Ferreira, Komandante Jerál PNTL, Komisáriu Polísia, Faustino da Costa, Komandante UPF, Reprezentante TLPDP inklui Autoridade lokál sira.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here