Prezidente CVTL, Madalena Hanjam. Imajen Tatoli/Hortençio Sanchez

DILI, 07 maiu 2021 (TATOLI)-Prezidente Krús Vermella Timor-Leste (CVTL, sigla portugés), Madalena Hanjam hateten, komemorasaun loron mundiál Krús Vermella, 08 maiu, tinan ne’e, mundu tomak sei foti tema “Hamutuk Ita La Para”.

Tema “Hamutuk Ita La Para”, Madalena Hanjam esplika, tanba haree ba situasaun mundu nian agora ema hotu enfrenta COVID-19, nasaun balun ema funu no haree sitasaun Timor-Leste rasik aleinde enfrenta COVID-19 iha mós kalamidade.

“Tema “Hamutuk Ita La Para” ne’e katak ita sente hotu saida mak akontese iha parte mundu ida-ne’e hanesan iha Timor-Leste karik akontese COVID-19 aumenta tan dezastre naturál,” Madalena Hanjam ba Agência Tatoli liuhosi telefónika, sesta ne’e.

Haree ba situasaun Timor-Leste hanesan COVID-19 no kalamidade ne’e rasik, CVTL nia papél mak fó kedan asaun imediata, hanesan prevensaun ba COVID-19 no prevensaun ba moras sira seluk hanesan, diarea, denge no halo evakuasaun vítima sira ba fatin segura haree vítima sira-nia han no hemu.

“Hanesan foin lalais akontese dezastre naturál iha territóriu Timor laran tomak, ita evakua vítima sira ba sentru evakuasaun sira no ajuda mós Ministériu Saúde, mantein nafatin fó prevensaun COVID-19 nian ba vítima no komunidade hotu oinsá iha situasaun difisil ida-ne’e kontinua prevene-an hosi surtu COVID-19,” Madalen Hanjam hateten.

Prezidente CVTL ne’e dehan, atividade ne’ebé durante sira halo ne’e mai hosi voluntarizmu sira, tanba forsa Krús Vermella nian laiha osan barak, maibé iha forsa mak movimentu podér umanitáriu mak bele halibur malu hosi ema ba ema hodi tulun fali ba maluk sira ne’ebé mak vítima no vulneravel liu.

Voluntarizmu presiza fuan boot

Nu’udár servisu voluntária iha CVTL), Grazinha da Silva Coceição hateten, sé de’it atu sai servisu voluntarizmu presiza fuan boot tanba servisu voluntária la iha osan ,maibé manan de’it mak esperiénsiaoinsá ajuda fali maluk ne’ebé presiza tulun.

Grazinha da Silva Coceição hateten, servisu voluntária presiza fuan boot tanba hosi servisu ne’e ema barak la hatene maibé nia valór boot liu osan.

“Ha’u seidauk hatene servisu voluntária hanoin CVTL nia servisu ne’e laiha valór, maibé ha’u sai voluntária iha CVTL, esperiénsia ne’ebé ha’u hetan mak servisu voluntária nia valór boot tebes,” Grazinha da Silva Conceição fó sasin.

Razaun nia tuir atividade CVTL ho inisiativa rasik atu sai voluntária iha CVTL hodi aprende matenek no esperiénsia nune’e bele ajuda ba família ne’ebé vulneravel liu.

“Esperiénsia ne’ebé ha’u aprende hosi CVTL hahú iha tinan 2016, to’o agora mak ha’u aprende matéria barak hanesan oinsá ba ajuda dahuluk, jestaun  dezastre, atividade juventude, saúde nian, nune’e bainhira ha’u aprende matéria sira-ne’e hotu tun ba implementa iha baze hanesan ba ajuda família vulneravel-sira, fahe informasaun kona-ba saúde oinsá sira moris ho saudavel, fahe informasaun ba juventude-sira oinsá sira bele deside sira-nia an sai joven ne’ebé mak di’ak,” nia hateten.

Mário José Guterres ne’ebé sai voluntáriu iha CVTL hateten, nia kontente bele hola parte iha CVTL maske la hetan osan maibé nia bele hetan esperiénsia balu hodi ajuda fali maluk seluk iha tempu susar.

“Bainhira ha’u hola parte iha CVTL buat ne’ebé  aprende mak prinsípiu hitu ne’ebé hanorin ha’u iha vontade atu ajuda ema la haree ba osan mak hanesan, Umanidade, imparsialidade, neutralidade, independénsia, voluntáriu, unidade no universalidade,” nia dehan.

Nia enkoraja ba maluk juventude-sira katak ema barak hanoin atividade CVTL ne’e atividade ne’ebé mak ema fó osan, maibé Krús Vermella hanesan umanitáriu ho voluntáriu no hosi voluntáriu laiha saláriu.

“Tanba ita fó uluk tempu ba voluntáriu mak hodi aprende buat ruma, serve fali ba ita-nia povu no nasaun,” nia hateten.

CVTL  harii hosi timor-oan na’in 16 iha loron 22 juñu 2020. Organizasaun umanitária ne’e estabelesida no rekoñese hosi Governu Timor-Leste iha 14 setembru 2005. CVTL rekoñesidu ho dekretu-lei nú. 6/2005.

Iha tempu portugés, filiál Kruz Vermella Portugál eziste to’o 1975 no iha périodu indonézia nian, sai nu’udar filiál ida hosi Palang Merah Indonésia (PMI) to’o 1999.

Vizaun hosi CVTL mak atu salva vida no hadi’a kualidade moris hosi ema mukit sira no misaun mak mobiliza no enkoraja foin-sa’e, voluntáriu no komunidade hodi promove atividade umanitária sira liuhosi organizasaun ne’ebé forte  no sustentavel iha territóriu Timor-Leste.

Jornalista   : Arminda Fonseca

Editór        : Francisco Simões

HAKEREK NO HATÁN

Please enter your comment!
Please enter your name here