Komunidade iha área Lagoa Tasi-tolu kuru bee hosi tanki ne’ebé governu prepara, kuarta (05/05/21). Imajen Tatoli/António Gonçalves.

DILI, 07 maiu 2021 (TATOLI)—Dadus hosi Ministériu Administrasaun Estatál (MAE), ho  Sekretáriu Estadu Protesaun Sivíl (SEPS), hatudu katak, oras-ne’e dadaun abitante hosi munisípiu Dili hamutuk 3.379 kontinua hela iha sentru evakuasaun.

“To’o ohin, populasaun 3.379 sura ba família 680 mak kontinua hela iha sentru evakuasaun,” SEPS, Joaquim Gusmão, hateten ba jornalista-sira iha edifísiu SEPS, Caicoli, sesta ne’e.

Notísia relevante:SEPS kontinua buka mate-isin na’in-sia

Joaquim Gusmão esplika, númeru redúz kada loron iha fatin evakuasaun ne’ebé fila-fali ba ida-idak nia hela-fatin, tanba  kondisaun hahú di’ak, no SEPS kontinua aprosima sira ne’ebé hela fatin di’ak, bele fila no sira ne’ebé hela-fatin estragu totál atu kontinua hela provizóriu.

Tuir ne’e mós rejista família afetadu ba dezastre naturál hamutuk 33.177 iha territóriu Timor-Leste (TL).

Hosi númeru ne’e, família besik 90% mak hosi Dili no 10%  hosi munisípiu, no intervensaun ne’ebé Governu halo maka, fó ona apoiu emerjénsia hanesan ai-han no la’ós ai-han ba família 50% hosi totál família 33.177.

Governu liu hosi Sekretária Estadu Protesaun Sivíl (SEPS), sei kontinua distribui apoiu ba família-sira seluk.

Ekipa ne’ebé lidera hosi MAE hamutuk ho protesaun sivíl no mós parseiru-sira, halo ona levantamentu dadus ba uma ne’ebé hetan estragu, nune’e bele fó apoiu rekoperasaun hodi konstrui fila-fali.

Rezultadu levantamentu, iha uma 25.000 mak afetadu, iha uma 24.000 aat kamán, aat natón 553 ho aat totál 554.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here