Ema deskoñesidu, kuarta kalan, tuda ambulánsia no pesoál saúde-sira iha Suku Afloicai, Postu Administrativu Uato-Lari, Munisípiu Viqueque. Imajen/Espesiál

DILI, 06 maiu 2021 (TATOLI)-Ema deskoñesidu, kuarta kalan, tuda ambulánsia no pesoál saúde-sira bainhira ba foti pasiente pozitivu COVID-19 ida iha Aldeia Lenah, Suku Afloicai, Postu Administrativu Uato-Lari, Munisípiu Viqueque.

“Akontesimentu ema deskoñesidu tuda ambulánsia ne’ebé ha’u lori ne’e, objetivu loloos bainhira ami atu ba foti pasiente pozitivu COVID-19 iha Suku Afloicai, mak ema tuda ami iha dalan-klaran,” koordenadór Médiku Sentru Saúde Uato-Lari, Munisípiu Viqueque, Bendito Magno informa, liuhosi telefónika, kinta ne’e.

Kronolojia hosi akontesimentu ne’e, Bendito Magno hateten, bainhira ekipa saúde COVID-19 hosi Uato-Lari ba evakua pasiente pozitivu ida iha nia uma iha Aldeia Lenah,  Suku Afloicai no bainhira konversa hela ho pasiente husu halo ona kontaktu fíziku ho sé de’it.

“Karreta foin besik atu to’o pasiente nia uma, maka ema tuda dala rua, hodi rezulta karreta nia vidru oin rahun no vidru besik kondutór nian mós rahun hotu,” nia haktuir.

Maske horikalan ne’e ema tuda maibé nia dehan, sira nafatin kontinua ba foti pasiente pozitivu iha Suku Afloicai no kontinua ba fatin seluk foti pasiente tanba horikalan iha Uato-Lari pasiente pozitivu na’in-lima kedas.

“Ha’u dehan ba kolega sira no Polísia katak maske ema tuda, maibé ita labele lakon ita-nia espíritu servisu. Sira atu trata, tolok, tuda, no oho ita mós, ita firme nafatin ho espíritu ita lalika ta’uk tanba ita serve ita-nia povu,”  nia haktuir.

Karreta Sentru Saúde Uato-Lari nian ne’ebé rahun lori ona mai Dili. Maske nune’e, ekipa saúde kontinua asume sira-nia papél hodi atende povu iha área saúde nian.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here