Governu transporta apoiu umanitáriu ho elikópteru ba Munisípiu Covalima, tersa (04/05). Imajen média MI/Dok.

DILI, 05 maiu 2021 (TATOLI)—Governu kontinua transporta apoiu umanitáriu ho elikópteru ba munisípiu Covalima, atu bele tulun família 250, ne’ebé afetada ba dezastre naturál iha 04 abríl tinan ne’e.

Ekipa ne’ebé envolve ba transportasaun apoiu umanitáriu ne’e, kompostu hosi Gabinete Primeiru-Ministru, Ministériu Solidariedade Sosiál no Inkluzaun (MSSI), Ministériu Defeza liu hosi FALINTIL Forsa Defeza Timor-Leste (F-FDTL), Ministériu Interiór (MI) liu hosi Sekretáriu Estadu Protesaun Sivíl (SEPS) no Polísia Nasionál Timor-Leste (PNTL).

Notísia relevante:SEPS oferese apoiu emerjénsia ba família 391 iha Laclubar

Ekipa ne’e estabelesidu, refleta estrutura operasionál no hetan ona aprovasaun, ho objetivu atu organiza operasaun voo aviaun elikópteru, durante fulan ida iha Timor-Leste hodi halo distribuisaun apoiu emerjénsia ba família vitima, ne’ebé afetada hosi dezastre siklon tropikál seroja.

“Iha loron 04 maiu, transporta  foos kg 25 ho totál saka  60,  manta karol haat  ba iha Suai hodi aumenta stoke iha armajén. Ohin, sei kontinua transporta tan foos saka 100 hodi responde ba família afetada 250,” ajenda transportasaun hosi SEPS, ne’ebé Agénsia Tatoli asesu, kuarta ne’e.

Iha loron hanesan, parte Serbisu Autónomu Medikamentu no Ekipamentu Saúde (SAMES) mós transporta ekipamentu médiku COVID-19 ba Covalima ho elikópteru, hanesan  mákina ventiladór ida (1), mákina oxijéniu konsentradór ida (1), máskara ho marka N-95 kaixa rua (2), fatin ba transfusaun ran kaixa ida (1), luvas liman hamutuk kaixa tolu, no gauze roll ho medida 90×90 kaixa tolu.

Hafoin sorumutu ho Primeiru Ministru (PM), Taur Matan Ruak iha rezidénsia Farol, (04/05) lokra’ik, Ministru Administrasaun Estatál (MAE), Miguel de Carvalho Pereira, hateten ba jornalista sira, katak, tuir dadus hosi MAE rejista ona família afetada dezastre naturál aumenta  ba  33.177 iha territóriu.

Hosi númeru ne’e família besik 90% mak hosi Dili no 10%  hosi Munisípiu no intervensaun ne’ebé Governu hala’o mak fó ona apoiu emerjénsia hanesan ai-han no la’ós ai-han ba família 50% hosi totál família 33.177.

Governu liu hosi Sekretária Estadu Protesaun Sivíl (SEPS), sei kontinua distribui apoiu ba família sira seluk.

Ekipa ne’ebé lidera hosi MAE hamutuk ho protesaun sivíl no parseiru-sira halo ona levantamentu dadus ba uma ne’ebé hetan estragu, nune’e bele fó apoiu rekoperasaun.

Rezultadu levantamentu ne’e, Governu kompromete sei fó solusaun ba família sira ne’ebé mak uma hetan estragu, hamutuk família 25.000 mak afetadu, iha uma 24.000 aat kamán, aat natón 553 no aat totál 554.

Parte SEPS iha esperansa katak, Orsamentu Retifikadu ne’ebé prevee ona  hamutuk millaun $55 no hetan ona promulgasaun hosi Prezidente Repúblika (PR), sei fó forsa liu-tan ba SEPS atu bele kontinua fó asisténsia umanitária no mós rekoperasaun.

Entretantu, Governu Austrália ho kompañia petrolífeira Santos, aluga aviaun elikópteru hosi kompañia aviasaun MCCDERMOTT Austrália ho númeru N365JA, hodi apoiu Timor-Leste ba mobilizasaun distribuisaun apoiu umanitáriu, liu-liu ba área izoladu durante fulan ida to’o iha fulan maiu nia rohan, no iha 22 abríl elikópteru ne’e hahú  halo operasaun.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here