EDTL instala iluminasaun iha estrada área Taibesi, Dili. Imajen/Mídia MOP-EDTL

DILI, 04 maiu 2021 (TATOLI)-Eletricidade de Timor-Leste, Empreza Públika (EDTL,E.P) halo ona manutesaun ba lámpada iluminasaun iha estrada públika, atu fó naroman ba movimentasaun komunidade iha tempu kalan.

Prezidente Konsellu Administrasaun EDTL,E.P, Paulo da Silva, hateten ekipa task force kontinua serbisu halo manutensaun iha área Lampu Merah 88 to’o Caicoli iha Ministériu Administrasaun Estatál (MAE) oin.

“Ekipa task force kontinua halo esforsu hodi normaliza lámpada iluminasaun iha estrada públika sira hodi fasilita movimentasaun iha tempu kalan ho seguru,” Prezidente Konsellu Administrasaun EDTL,E.P hateten liuhosi nota ne’ebé Agência TATOLI asesu, tersa ne’e.

Serbisu manutensaun sei kontinua hala’o iha estrada ninin iha fatin públiku inklui jardín sira iha Dili.

Pakote servisu manutesaun iluminasaun iha estrada hahú hosi Pálasiu Governu to’o Palásiu Nobre, Audian, Metiaut, Cristo Rei, Becora, Bairro dos Grillos, Bemori, Culuhun, Bidaun, Santa Cruz, Quintal Kiik, Bebonuk, Lahane, Bekuse, Taibesi no fatin seluk.

Enkuantu, EDTL halo mós manutesaun liña eletrisidade ne’ebé kobre hosi estrada Fatukama (hosi Estátua Cristo Rei) to’o Ponte BJ Habibie, no kontinua to’o estátua Amu Papa João Paulo inklui ahi iha jardín laran.

Nune’e, EDTL husu ba komunidade tomak atu tau-matan no kuidadu mós fasilidade públiku sira hotu no labele estraga.

“Husu ba Populasaun tomak iha kapitál Dili, atu kuidadu no labele estraga iluminasaun ne’ebé monta ona iha estrada públika sira”.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here