Sekretáriu Estadu ba Komunikasaun Sosiál (SEKOMS), Merício Juvinal dos Reis ‘Akara’. Imajen TATOLI/António Gonçalves

DILI, 03 maiu 2021 (TATOLI)–Sekretáriu Estadu ba Komunikasaun Sosiál (SEKOMS), Merício Juvinal dos Reis ‘Akara’ hato’o parabéns ba jornalista sira iha Timor-Leste ne’ebé selebra loron mundiál liberdade imprensa iha loron 03 maiu 2021 no iha esperansa bele hala’o knaar ho profisionál.

“Hein katak jornalista sira bele hala’o knaar ho profisionál liután hodi kontinua garante informasaun ba públiku iha ámbitu pandemia COVID-19,” refere nota ne’ebé Agência TATOLI asesu, segunda ne’e.

Governante ne’e konsidera, loron 03 maiu, nu’udar loron espesiál ba jornalista sira iha mundu inklui Timor-Leste, ne’ebé Organizasaun Nasaun  Unida (ONU) adota  hanesan loron mundiál liberdade imprensa hodi fó hanoin ba país hotu iha mundu tomak atu respeita loron ne’e.

Governu respeita tebes liberdade imprensa no iha vontade atu kontinua apoiu insitiuisaun mídia sira hodi kontinua hala’o sira-nia kna’ar ho independente, imparsialidade, respeitu kódigu étika jornalista no responsabilidade nu’udar pilar importante ba demokrasia.

Daudaun Timor-Leste hasoru hela obstáklu boot rua, hanesan dezastre naturál ne’ebé akontese iha loron 04 abríl no seluk mak pandemia COVID-19.

Nune’e, Governu halo esforsu hotu atu minimiza impaktu kalamidade rua ne’e no iha situasaun sira hanesan ne’e, jornalista sira-nia kontribuisaun maka atu tulun Estadu iha divulgasaun informasaun ne’ebé loloos, justu, kredível no edukativu liu atubele ajuda Estadu iha situasaun ida-ne’e.

Konstituisaun Repúblika Timor-Leste (KRDTL) iha artigu 41 no 42 mós garante liberdade imprensa no espresaun.

Tuir índise liberdade imprensa mundiál ba tinan 2021 hosi Report Without Borders (RSF), hatuur Timor-Leste iha pozisaun 71 ho pontuasaun globál 29,11, hosi totál país 180 ne’ebé organizasaun ne’e rekolla.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here