Sekretáriu Estadu Komunikasaun Sosiál, Merício Juvinal dos Reis ‘Akara’. Imajen TATOLI/Egas Cristóvão

DILI, 03 maiu 2021 (TATOLI)–Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, enkoraja jornalista sira hodi hadi’a produtu jornalizmu, nune’e pozisaun Timor-Leste iha aspeitu liberdade imprensa hetan klasifikasaun di’ak iha mundu.

“Ita-nia liberdade imprensa asegura duni no iha prátika ita hetan valor di’ak, maibé iha buat balun maka ita tenke hadi’a hanesan produtu jornalizmu ne’e rasik,” Sekretáriu Estadu hateten ba Agência TATOLI, iha ninia gabinete, iha Palásiu Governu, segunda ne’e.

Tuir nia, produtu jornalizmu tenke iha kualidade a’as no profisionál tuir kódigu étika jornalista.

“Tempu ona ita aproveita liberdade imprensa ho asisténsia públika di’ak ho konsiénsia tomak no matenek inklui evita interese pesoál,” nia akresenta.

Governante ne’e nota katak ikus mai produtu jornalizmu balun iha tendénsia barak.

“Ha’u akompaña no rona, ikus ne’e jornalista nia produtu iha tendénsia barak mai hosi personál, dalaruma ita buka de’it líder favóritu mak ita halo ba produtu jornalizmu ou bazeia de’it ba ita-nia gosta ka la gosta grupu ka líder balun,” nia hatutan.

Tuir Sekretáriu Estadu, presiza iha avaliasaun katak durante ne’e tuir misaun, regra no kódigu étika hodi bele hadi’a-an.

“Ita presiza hadi’a-an no brani hodi halo auto krítiku ba ita-nia an atu hahú agora ba oin produtu jornalizmu bele di’ak ba interese públiku,” nia fó hanoin.

Nune’e, nia husu jornalista bainhira halo notísia ida tenke bazeia ba faktu no realidade, ne’ebé konfirma ba parte relevante sira, nune’e bele eduka sidadaun sira.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here