Primeiru-Ministru, Taur Matan Ruak, hato’o felisitasaun ba jornalista timor-oan no mós jornalista hotu iha mundu tomak ba loron mundiál liberdade imprensa ne'ebé selebra iha loron 03 maiu, kada tinan. Imajen/GPM

DILI, 03 maiu 2021 (TATOLI)Primeiru-Ministru (PM), Taur Matan Ruak, hato’o  votu felisitasaun ba  jornalista sira hotu  iha  mundu tomak no partikularmente iha Timor-Leste ne’ebé ohin komemora loron mundiál liberdade imprensa.

“Lori ha’u-nia naran rasik no Governu nia naran, hakarak hato’o votu felisitasaun ba jornalista sira, espesialmente ba jornalista timor-oan sira hotu, ba imi-nia loron espesiál ohin,” Xefe Governu hato’o mensajen ne’e liuhosi nota imprensa ne’ebé Agência TATOLI asesu, segunda ne’e.

PM konsidera, loron 03 maiu nu’udar loron espesiál ida ba Jornalista sira no hanesan loron ne’ebé Nasaun Unida adota hanesan loron mundiál liberdade imprensa hodi fó hanoin ba país hotu iha mundu tomak atu respeita liberdade imprensa.

Aleinde ne’e, Governu respeita tebes liberdade imprensa no iha vontade atu kontinua apoiu insitiuisaun mídia sira hodi kontinua hala’o knaar ho independente, imparsialidade, respeitu kódigu étika jornalista no responsabilidade nu’udar pilar importante ba demokrasia.

“Ita-nia país daudaun ne’e hasoru hela obstáklu boot rua hanesan dezastre naturál ne’ebé akontese iha loron 04 abríl no seluk mak pandemia COVID-19, ne’ebé Governu halo esforsu atu minimiza impaktu kalamidade rua ne’e no iha situasaun sira ne’e, Jornalista sira-nia kontribuisaun maka tulun Estadu divulga informasaun ne’ebé loloos, justu, kredível no edukativu liu atubele ajuda ita-nia Estadu iha situasaun ida-ne’e,” Xefe Ezekutivu ne’e subliña.

Nune’e, PM agradese tebes ba kontribuisaun durante ne’e, ne’ebé hato’o ona informasaun ba públiku sira relativa ho atividade Governu, maski hasoru difikuldade oin-oin  iha terrenu maibé nafatin iha vontade.

“Ba ida ne’e, ha’u-nia hakuak boot ba imi hotu no dala ida tan parabéns,” Xefe Governu kongratula.

Tuir índise liberdade imprensa mundiál ba tinan 2021 hosi Report Without Borders (RSF), hatuur Timor-Leste iha pozisaun 71 ho pontuasaun global 29,11 hosi totál país 180 ne’ebé organizasaun ne’e rekolla.

“Ne’e hatudu katak ita-nia nível iha avansu di’ak liu iha Sudeste Áziatiku, kompara ho país balun ne’ebé ukun-an kleur ona, maibé sira-nia liberdade imprensa sei dook hosi ita-nia, tanba ne’e liberdade imprensa iha ita-nia nasaun nia iha fatin. Hanesan Primeiru-Ministru, ha’u orgullu no ita hotu tenke orgullu ba prestasaun ida-ne’e,” PM subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here