Deputada hosi bankada PLP, Maria Angelina Sarmento. Imajen Egas Cristovão

DILI, 03 maiu 2021 (TATOLI)—Bankada parlamentár Partidu Libertasaun Popular (PLP) husu Governu kria kondisaun ba juventude Frente Klandestina tanba oras ne’e juventude rezisténsia barak mak marjinalizadu.

“Ha’u hakarak atu hato’o de’it ba Governu atu kria kondisaun ba joven rezisténsia sira iha frente klandestina nian tanba sira uluk iha liña frente iha luta ba libertasaun nasionál, agora barak mak marjinalizadu. Joven sira uluk iha oin agora iha kotuk liu, sira-ne’ebé uluk iha kotuk agora mak iha oin. Tanba ne’e mak ami husu ba Governu atu fó atensaun ba juventude rezisténsia sira,” Deputada Bankada PLP Maria Angelina Lopes Sarmento, levanta kestaun ne’e iha plenária, segunda ne’e.

Tanba, nia dehan, juventude rezisténsia balu mate sein ba rejistu iha Komisaun Omenajen, afinál juventude rezisténsia sira iha luta ida ke ho valór boot tebes.

Nune’e mós juventude rezisténsia barak mak la konsege rejistu maibé balu fila-hikas ona ba aman Maromak tanba ba rejistu ema mai ho konseitu ida katak atu hetan subsídiu tanba ne’e mak barak mak lakohi ba rejistu iha Komisaun Omenajen.

Nia hatutan, juventude sira mós la fó importante ba rejistu katak rejistu ida-ne’e atu hetan ka la hetan rekoñesimentu ba sira-nia partisipasaun iha luta, agora sira la rejistu entaun posivelmente sira-nia oan sei asesu ba rekursu Estadu nian.

Reprezentante Povu ne’e sente triste tanba juventude rezisténsia barak mak ho vida marjinalizadu hosi prosesu ukun rasik-aan.

“Sira barak la goza independénsia ida-ne’e tanba sira husik ona sira-nia vida. Ho nune’e, ami nu’udar jerasaun kontinuadór luta ba rai ida-ne’e husu ba Governu atu tau matan ba oan-ki’ak sira, ne’ebé mak sira la hetan kondisaun. Sira-nia inan-aman mate ona, ne’ebé ke fó sira-nia vida ba rai ida-ne’e maibé sira laiha kondisaun, sira mós la hetan opurtunidade atu eskola to’o nível ida-ne’ebé aas,” nia fó hanoin ba Governu.

Nia husu ba Governu presiza atu iha fleksibilidade ba protesaun sosiál ba juventude sira, liuliu atendimentu saúde ba juventude rezisténsia sira.

“Ba sira-ne’ebé seidauk rejistu karik, Governu bele simu reprezenta hosi organizasaun rezisténsia sira maske sira mate ona atu nune’e sira-nia dadus kona-ba luta ne’e bele iha Komisaun Omenajen nune’e bele asesu ba rekursu Estadu nian,” nia dehan.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here