Jornalista sira bainhira halo kobertura iha ámbitu luta kontra COVID-19. Imajen TATOLI/Egas Cristóvão

DILI, 03 maiu 2021 (TATOLI)—Governu liuhosi Ministériu Asuntu Parlamentár no Komunikasaun Sosiál (MAPKOMS) kongratula profisionál komunikasaun sosiál no timor-oan hotu iha ámbitu selerasaun loron mundiál liberdade imprensa, ne’ebé mundu tomak selebra iha loron 03 maiu.

“VIII Governu Konstitusionál komprometidu atu promove bebeik dezenvolvimentu setór Komunikasaun Sosiál no dezenvolvimentu ba ninia padraun profisionál sira,” refere nota ofisiál hosi Portál Governu, ne’ebé Agência TATOLI asesu, segunda ne’e.

Liberdade imprensa iha Timor-Leste hetan garantia hosi Konstituisaun iha artigu númeru 40 – liberdade espresaun no informasaun no númeru 41 – liberdade imprensa no meiu komunikasaun sosiál sira.

“Objetivu Dezenvolvimentu Sustentável Nasaun Unida ne’ebé Timor-Leste adota, foka liu ba objetivu 16, ne’ebé defende katak determinasaun públiku bele hetan informasaun no proteje liberdade fundamentál sira,” nota subliña.

Bazeia ba índise mundiál kona-ba liberdade imprensa tinan ida-ne’e nian, ne’ebé habelar ona hosi asosiasaun ‘reporter sira ne’ebé la iha ketan (Sem Fronteiras)’, hatuur Timor-Leste hanesan nasaun ne’ebé hetan klasifikasaun di’ak liu iha Sudeste Aziátiku relasiona ho nível liberdade ne’ebé fó ba jornalista sira, ne’ebé iha nível país okupa pozisaun 71.

“Pozisaun ne’e sa’e tan pontu hitu kompara ho tinan 2020 nian, nune’e mós Timor-Leste klasifikadu hanesan nasaun ne’ebé iha sensibilidade ba profisaun journalizmu entre país 180 ne’ebé hetan ona avaliasaun hosi asosiasaun ne’e iha mundu tomak,” nota esklarese.

Iha kontestu atuál Timor-Leste, nasaun hasoru hela pandemia COVID-19, ne’ebe lori impaktu negativu ba ekonomia rai laran.

Aleinde ne’e hasoru mós dezastre naturál ne’ebé provoka estragu millaun $100-resin, hanesan infraestrutura públika no provoka ema hamutuk 40-resin maka lakon vida.

“Governu esforsu no halo intervensaun oin-oin hodi restaura fali saúde públika kauza hosi COVID-19, estragu infraestrutura sira, no tau matan ba komunidade afetadu hosi impaktu Siklone Tropikál Seroja ne’ebé maka akontese iha loron 04 abríl liubá,” nota ezekutivu esplika.

Iha kontextu pandemia COVID-19, informasaun mak sai hanesan fatór importante atu sensibiliza populasaun sira hodi halo reasaun prevene pandemia ne’e.

Governu entende katak, importante tebes atu iha garantia ba orgaun komunikasaun sosiál privadu sira, nune’e bele iha kondisaun atu kontinua servisu iha redasaun idaidak ninian hodi asegura divulgasaun informasaun no kampaña sensibilizasaun hodi permite populasaun sira iha territóriu nasionál bele informadu kona-ba evolusaun pandemia no mós kona-ba prosedimentu seguransa no prezervasaun saúde públika ne’ebé presiza ema hotu nia kontribuisaun.

Aleinde ne’e, dezde tinan 2020 bainhira hahú rejista pandemia Sars-Cov2 iha Timor-Leste no implementasaun Estadu Emerjensia, Governu konsudera papel importante profisionál komunikasaun sosial sira iha luta hasoru pandemia global ne’e.

Governu mós aloka verba orsamentu iha Fundu COVID-19 hodi apoiu jornalista liña frente sira hodi servisu hamutuk ho orgaun komunikasaun sosial sira hodi halo kampaña sensibilizasaun ba prevensaun no mitigasaun Covid-19 iha Timor-Leste.

Iha tinan ida ne’e, Governu liuhosi MAPKOMS aloka nafatin verba orsamentu iha Fundu COVID-19 hodi apoiu ba Jornalista liña frente sira, ba kampaña publisitária kona-ba prevensaun no mitigasaun COVID-19 no hakbiit kapasidade orgaun komunikasaun sosiál sira atu iha kondisaun halo servisu iha períodu pandemia ida ne’e nu’udar parte integradu ida iha planu rekoperasaun ekonomika.  

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here