Billete Identidade. Imajen Tatoli.

DILI, 03 maiu 2021 (TATOLI)—Janeiru to’o marsu, Diresaun Jerál Serbisu Rejistu Notariadu (DNRN), Ministériu Justisa (MJ), atende Timoroan 14.489 ne’ebé trata Billete Indentidade (BI).

“Ita atende ema na’in 14.489 mak halo no renova Billete Identidade iha territóriu,” Diretór Nasionál Identifikasaun Sivíl no Rejistu Kriminál, Victor da Costa Neto, hateten ba Agéncia Tatoli iha kna’ar fatin Colmera, segunda ne’e.

Notísia relevante:DNRN atende de’it serbisu urjénsia

Atendimentu serbisu rejistu notariadu sentraliza iha kada Munisípiu, hodi prodúz BI gratuitamente ba Timoroan hahú hosi idade 17.

“Prosesu atu hetan BI, tenke Timoroan, lori ho sertidaun moris no kartaun eleitorál, to’o loron rua ka tolu bele foti,’’ nia esplika.

Baze legál ba Diresaun Nasionál Serbisu Notariadu, hatuur iha lei númeru 9/2002 ne’ebé define estatutu legál nasionalidade ba sidadaun ida-idak, atu hela iha territíriu nasionál Timor-Leste, ho regulamentu dekretu lei númeru 1/2004 artigu 23 ne’ebé ko’alia kona-bá Identidade.

Alende ne’e, iha mós lei númeru 2/2004 ne’ebé fó kna’ar atu bele emite identidade hanesan estatutu legál sidadania ba ema ne’ebé hela iha territóriu.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here