Ministru Transporte Komunikasaun, José Agostinho da Silva, akompaña hosi Prezidente ANC, João Oliveira Freitas, atribui sertifikadu ba Jestór kompañia Raph Vision, iha edifísiu ANC, Caicoli, segunda (03/05). Imajen TATOLI/Natalino Costa

DILI, 03 maiu 2021 (TATOLI)—Ministériu Transporte no Komunikasaun (MTK) liuhosi Autoridade Nasionál Komunikasaun (ANC, sigla portugés), atribui sertifikadu rejistu servisu fornesimentu liña internet ka Internet Service Provider (ISP) ba kompañia Raph Vision  Unip.LDA ho númeru rejistrasaun 04.

Ministru Transporte Komunikasaun, José Agostinho da Silva, hateten atribuisaun sertifikadu ne’e liu prosesu naruk, ne’ebé presiza kompleta rekezitu.

“Bainhira kompañia atu hetan rejistu ISP, tenke kumpre rekezitu ne’ebé hatuur iha dekretu-lei númeru 15/2012, artigu 30, no kona-ba kestaun ne’e kompañia Raph Vision kumpre rekezitu tékniku no administrativu,” Ministru informa iha edifisiu MTK, Caicoli, segunda ne’e.

Notísia relevante: ANC atribui sertifikadu lisensa ba Metrolink oferese liña internet

Iha biban ne’e, governante ne’e enkoraja kompañia hodi servisu ho di’ak no kualidade liuhosi fornesimentu internet ba setór públiku no privadu.

“Faze ohin importante tanba atribui sertifikadu, maibé  di’ak liután hatudu ho asaun. Ha’u hakarak asaun iha terrenu oinsá maka halo atendimentu ba kliente sira ho dignu, kualidade ho velosidade internet ne’ebé maka di’ak inklui presu ne’ebé kompetetivu,” nia dehan.

Nune’e mós, Ministru husu Raph Vision atu kumpre obrigasaun kontribui reseita ba kofre Estadu, tanba bainhira kontra rekezitu maka autoridade kompetente sei aplika sansaun administrativa.

Iha fatin hanesan, Jestór Raph Vision  Unip.LDA, Yohanes Jeti Yap, kompromete  sei kumpre regra ne’ebé estabelesidu ona.

“Ida-ne’e hanesan rejistrasaun ne’ebé ami kompleta ona ho ami-nia direitu, tanba ne’e ami sei esforsu fornese internet kualidade ba Timor-Leste,” nia hatutan.

Nia dehan, ekipa téknika sira sei tuur hamutuk hodi ko’alia kona-ba servisu fornesimentu liña internet ba kliente.

Antes ne’e , ANC atribui ona na sertifikadu rejistu ISP ba kompañia sira hanesan Guardamor, Metrolink, Global-net, no tuir planu iha tempu badak  sei atribui serifikadu hanesan ba kompañia sira seluk.

Tuir dekretu-lei númeru 15/2012, 28 marsu, kona-ba regulamentu ba setór telekomunikasaun, iha artigu 30 kona-ba rejistu, deskreve katak ema ida labele presta servisu telekomunikasaun, ka opera rede relekomunikasaun ida, enkuantu seidauk rejistu iha ANC, atu presta servisu no fornese rede telekomunikasaun ba kliente.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here